Vidhnin magazina në autostradë, 3 në pranga, një në kërkim
Policia e Tiranës tha dje se ka zhvilluar një operacion për parandalimin e vjedhjeve, ndërsa kishte zbardhur dhe dokumentuar disa vjedhjeve të ndodhura më parë. Nga shërbimet e Policisë të Komisariatit Nr. 6, u bë arrestimi në flagrancë i 3 personave dhe u shpall në kërkim një tjetër, pasi dyshohen për vjedhje magazinash në autostradën Tiranë– Durrës. Të arrestuarit janë Artur Marku, 21 vjeç, banues në Fushë- Mëzezë, i dënuar më parë për vjedhje e plagosje, Ogert Skordha, 27 vjeç, banues në Tiranë, i dënuar më parë për vjedhje, si dhe Amarildo Jashari, 20 vjeç, banues në Tiranë, i dënuar më parë për vjedhje. Gjithashtu u shpall në kërkim policor bashkëpunëtori tjetër, shtetasi me iniciale F. M., 30 vjeç, banues në Durrës, po ashtu i dënuar më parë për vjedhje. Sipas Policisë, këta persona, në bashkëpunim me njëri- tjetrin, në autostradën Tiranë- Durrës, kanë vjedhur magazinat e një kompanie në pronësi të shtetasit E. T. Gjithashtu, nga veprimet hetimore të kryera rezulton se këta shtetas janë autorë edhe të 4 vjedhjeve të tjera të ndodhura më parë. Sipas Policisë, ata dyshohen për vjedhjen e ndodhur më datë 17 qershor, ku në rrugën “Llazi Miho”, është vjedhur një motor në pronësi të shtetasit V. K.. Më datë 24 qershor dyshohet se në rrugën “Tre Dëshmorët”, është vjedhur banesën e shtetasit F. B. Më datë 29 qershor dyshohet se në rrugën “Konferenca e Pezës”, kanë vjedhur dyqanin në pronësi të shtetasit S. Ç. dhe më datë 20 qershor, në rrugën “Aleksandri i Madhi”, dyshohet se kanë vjedhur kabull të energjisë elektrike.