Tritol në banesë, dyshime për konflikte të emigrantit
Pronari jeton në Belgjikë, flakët shkaktuan dëme materiale
Tritol banesës së emigrantit në Belgjikë, dyshohet për konflikte jashtë vendit. Një shpërthim me lëndë plasëse ka tronditur mëngjesin e së enjtes zonën e Zejmenit në Lezhë.
Ngjarja ka ndodhur pak pas mesnatës dhe kanë qenë banorët e zonës që kanë lajmëruar Policinë për një shpërthim të fuqishëm, që më pas shkaktoi dhe përfshirjen nga flakët të një banese. Policia shkoi menjëherë në vendngjarje bashkë me zjarrfikësen, e cila arriti të shuante flakët, ndërkohë që kanë nisur hetimet për zbardhjen e plotë të rrethanave të ngjarjes. Nga hetimet paraprake mësohet se, tritoli ishte vendosur në banesën e shtetasit Albert Hasani, shpërthim i cili sipas të dhënave ka shkaktuar dëme materiale, edhe për shkak të zjarrit që u përhap më pas. I riu, banesa e të cilit ka qenë në shënjestër, sipas fqinjëve jeton prej kohësh në Belgjikë dhe në momentin e shpërthimit në banesë nuk ka pasur njerëz. Ngjarja që tronditi banorët e fshatit mësohet se ka ndodhur rreth orës 01: 00 të së enjtes. Shpërthimi ka qenë i fuqishëm, gjë e cila ka shkaktuar panik te banorët e Zejmenit. Kanë qenë këta të fundit që kanë vënë në dijeni Policinë për ngjarjen, ndërsa pak minuta pas shpërthimit banesa është përfshirë dhe nga flakët. "Më datë 02.08.2018, rreth orës 01: 00, është marrë njoftim se në banesën e shtetasit A. H., banues në Zejmen, ( aktualisht emigrant), është vendosur dhe ka shpërthyer një lëndë e dyshuar eksplozive. Për pasojë ka vetëm dëme materiale, pasi në banesë nuk ka qenë asnjë person. Grupi hetimor nën drejtimin e Prokurorisë pranë Gjykatës së Shkallës Parë Lezhë, vazhdojnë hetimet për zbardhjen e plotë të rrethanave të ngjarjes", bëhet e ditur nga Policia. I zoti i shtëpisë, Albert Hasani, 31 vjeç, mësohet se jeton prej disa vitesh në Belgjikë. Nisur nga ky fakt, Policia ka dyshime se vendosja e eksplozivit në banesën e tij ka ardhur pikërisht për shkak të konflikteve të mundshme të tij në këtë shtet. Gjithsesi, gjithçka mbetet në kuadër të dyshimit, pasi Policia ende nuk ka asnjë person të dyshuar për vendosjen e tritolit në banesën e emigrantit. Por nga ana tjetër, nuk përjashtohet si pistë as ndonjë konflikt i hershëm i Albert Hasanit në zonën e tij të banimit, që ka sjellë hakmarrjen me anë të vendosjes së tritolit në banesë. Policia e Lezhës ka marrë në pyetje fqinjët e emigrantit si dhe banorë të tjerë të zonës për të dhënë ndonjë informacion të vlefshëm për hetimet. Mësohet se fqinjët kanë deklaruar se gjithçka që kanë dëgjuar ka qenë zhurma e shpërthimit, pasi në atë orë që ndodhi ngjarja kanë qenë në gjumë. Policia e Lezhës zyrtarisht thotë se nuk ka ende asnjë person të ndaluar si të dyshuar për këtë ngjarje, ndërkohë që hetimet për zbardhjen e rrethanave të shpërthimit vazhdojnë ende.