Shifra e frikshme, kemi 1 pikë bastesh për 678 banorë
PD denoncon koncensionin e ri, do përfitojë familja e Ramës
Shqipëria ka 1 qendër lojërash fati për çdo 678 banorë. Sipas të dhënave të Qendrës Kombëtare të Biznesit, aktualisht në Shqipëri operojnë 4230 aktivitete të lojërave të fatit, shifër kjo që kur përpjesëtohet me numrin e përgjithshëm të popullsisë prodhon një mesatare të frikshme, sa i takon dendësisë së ushtrimit të këtyre aktiviteteve.
Kthimi në Kuvend i ligjit për lojërat e fatit nga Presidenti i Republikës ka rikthyer debatin për numrin e lartë të pikave të lojërave të fatit, që ushtrojnë aktivitetin e tyre në Shqipëri. Partia Demokratike, prej disa ditësh ka akuzuar qeverinë për politikat lehtësuese që ka ndërmarrë për të favorizuar pikat e lojërave të fatit. Sipas demokratëve, brenda katër vitesh, numri i pikave të lojërave të fatit është katërfishuar. Demokratët kanë kujtuar se në 2013 ishin 928 pika bastesh, bixhozi dhe kazinosh, ndërkohë që aktualisht janë 4230 të tilla. Sipas të dhënave të paraqitura nga PD- ja, shqiptarët në vitin 2017 kanë humbur 132 milionë euro në bixhoz. Përmes një deklarate për medi- at nga selia blu, nënkryetarja e Komisionit të Ekonomisë, Jorida Tabaku, ka akuzuar Kryeministrin Rama se i ka dhënë të vëllait monopolin e kontrollit të tregut të bixhozit, duke fituar miliona euro nga numri i lartë i pikave të basteve. “Katërfishimi i pikave të basteve në Shqipëri nuk është thjesht një marrëzi e Edi Ramës, por është një plan korruptiv i mirëmenduar për t’i dhënë të vëllait, Olsi Rama, miliona euro fitime nëpërmjet koncesionit të mbikëqyrjes së lojërave të fatit. Ajo që dihet deri tani është se me ligjin e vitit 2015, Edi Rama detyron pikat e basteve të bëjnë pagesën e mirëmbajtjes së sistemit jo në shtet, por te kompania konce- sionare. Kjo do të thotë se, sa më shumë pika bastesh të operojnë në Shqipëri, aq më i madh është fitimi i kompanisë koncesionare, që zyrtarisht operon në emër të ortakut të vëllait të Kryeministrit. Kjo është arsyeja pse në treg, në vitin 2013 ishin 928 pika bastesh dhe 4 vjet pas ardhjes në pushtet të Edi Ramës, pikat e basteve janë katërfishuar, duke numëruar 4230 pika bastesh”, tha Tabaku. Sipas deputetes demokrate, PD- ja do të anulojë çdo ligj selektiv të miratuar nga qeveria e Edi Ramës, kur të vijë në pushtet. “Kur ligji të hyjë në fuqi më 1 janar 2019, tatimi mbi fitimin e biznesit të bixhozit nuk do të jetë më 25 për qind, por gati është përgjysmuar, në 15 për qind. Partia Demokratike është e vendosur të anulojë çdo ligj selektiv, çdo koncesion që është monopol dhe çdo favorizim nga ata që sot qeverisin me krimin e organizuar dhe po pastrojnë paratë në ekonomi. Rishikimi i ligjit antimafia do të sigurojë që çdo qindarkë e krimit të organizuar dhe korrupsionit të kthehet në ekonomi”, deklaroi deputetja e PD- së.