Vuçiç, letër serbëve në Veri të Kosovës: Mos shpallni autonominë
Presidenti i Serbisë, Aleksandar Vuçiç, u është drejtuar serbëve të Kosovës nëpërmjet një letre, duke iu kërkuar që të mos ndërmarrin asnjë hap të shtunën, dita kur skadon afati për hartimin e statutit të Asociacionit të Komunave me shumicë serbe, pasi sipas Vuçiç, shqiptarët dhe një pjesë e bashkësisë ndërkombëtare do të ndërmerrnin aksione kundër tyre. Një skenar i disa eksponentëve të Kishës Ortodokse në Kosovë thotë se serbët po planifikonin të shpallnin autonominë e tyre nga Kosova, të dielën, më 5 gusht. Prifti Sava Janjiç, i cili ka folur publikisht për këtë gjë, tha se ka pasur informacione se situata në Veri do të përshkallëzohej. Nëse drafti nuk do të përgatitej më 4 gusht, siç është afati, serbët do të ndërmerrnin hapa të njëanshëm. Vuçiç, në letrën e tij thotë s, për sa kohë ai do të jetë në krye të shtetit të Serbisë, nuk do të lejojë dhunë të organizuar mbi serbët dhe objektet religjioze e as përndjekjen e tyre. “As kësaj here Prishtina nuk do të lëvizë as gishtin për të formuar Asociacionin e komunave serbe”, tha ai. Vuçiç ka lutur qytetarët serbë që të mos ndërmarrin asgjë, pasi sipas tij, këtë do të mund ta shfrytëzonin shqiptarët ose një pjesë e bashkësisë ndërkombëtare si pretekst për të ndërmarrë çfarëdo aksioni ndaj tyre. Presidenti serb ka thënë se ruajtja e paqes në Kosovë është detyrë parësore e NATO- s, prej së cilës pret dhe kërkon që “ta ruajnë paqen në atë mënyrë që të pengojnë çfarëdo tentimi eventual të kujtdo dhe me çfarëdo preteksti që ta marrin dhe ta grabisin hidro- elektranën ‘ Gazivoda’ ( Ujman) dhe trafo- stacionin ‘ Vallaç’ ose cilindo objekt kyç infrastrukturor, prej të cilit varet mbijetesa e serbëve”. Vuçiç është shprehur po ashtu se për hir të paqes e stabilitetit do të angazhohet për zgjidhje paqësore dhe kompromisi të marrëdhënieve në Kosovë dhe nuk do të ndalet derisa serbëve t’u sigurohen të drejta më shumë sesa kanë sot.