Xhafaj inauguron pikën kufitare në Hanin e Hotit
Tregon sms- të me Vlahutin: Kur mbarojnë punimet?
Ministri i Brendshëm, Fatmir Xhafaj, ishte i pranishëm dje në ceremoninë e inaugurimit të pikës kufitare të Hanit të Hotit. Projekt ky që u financua nga programet e asistencës së BE- së, ( IPA2012), që shkoi në rreth 2.5 milionë euro. Në ceremoni morën pjesë edhe ambasadorja e BE- së në Tiranë, Romana Vlahutin, si dhe ministri i Brendshëm i Malit të Zi. Gjatë fjalës së tij, Xhafaj tregoi lehtësimin që do kenë qytetarët me hapjen e kësaj pike. Ndërsa nuk nguroi të ndante me të pranishmit edhe korrespondencën me Vlahutin, gjatë kohës që zhvillohej ky projekt. Mesazhe që sipas tij kishin të bënin me përfundimin e punimeve e nga të cilat tashmë do të shpëtojnë të dy në këto ditë të nxehta gushti. Po ashtu, Xhafaj u ndal edhe te projekti tjetër, ai i Pikës së Morinës, duke shprehur një falënderim të veçantë për ambasadoren Vlahutin, e cila ka qenë personalisht e angazhuar në implementimin e tyre, së bashku me stafin e saj të delegacionit në Tiranë. “Ju faleminderit zonja ambasadore! Keni bërë vërtet shumë. Kam qenë plotësisht i bindur që ju nuk do të largoheshit nga Shqipëria pa i përfunduar këto dy projekte. Më në fund edhe unë nuk do kem në inboksin e telefonit tim vazhdimisht mesazhe: - Çfarë bëhet me Morinën? Çfarë bëhet me Hanin e Hotit! Nuk po punohet mirë atje. Jemi mbrapa, kur do përfundojnë? - Dhe të dy besoj se do të biem të qetë për këto ditë gushti të nxehta që të mos kemi më korrespondenca të tilla”, u shpreh Xhafaj. Nga ana tjetër, ministri shtoi se është një fakt inkurajues që ky sezon turistik ka qenë i mbarë dhe me një aktivitet normal në pikat tona të kalimit kufitar. “Masat që kemi marrë në kuadër të mbarëvajtjes së sezonit turistik parashikojnë edhe lehtësimin e qarkullimit të njerëzve dhe mjeteve në portat hyrëse, një ngarkesë që deri më sot për fat është përballuar më së miri dhe që natyrisht ky zgjerim i pikës hyrëse në këtë kalim kufitar, do ta lehtësojë akoma më shumë këtë lëvizje”, tha ai. Ndërsa tha se objektet e reja që u përuruan dje do të japin ndihmesën e vet në lehtësimin e qarkullimit të shpejtë edhe të turistëve nga vendi ynë, por edhe ata që hyjnë në territorin tonë.