Urdhri i ministres së Arsimit: Nga shtatori, s’ka celularë në shkolla
Si nxënësit dhe mësuesit nuk mund të përdorin telefonin gjatë orës së mësimit. Ajo që është përfolur edhe më herët, tashmë është bërë urdhër i prerë. Dokumenti i zbardhur me firmën e ministres së Arsimit, Lindita Nikolla, mban datën 30 korrik dhe do të nis zbatimin që këtë vit mësimor, nga data 17 shtator, kur pritet nisja e vitit të ri shkollor. “Urdhëroj ndalimin e përdorimit të telefonit celular gjatë procesit mësimor nga mësuesit dhe nxënësit, në të gjitha shkollat e arsimit parauniversitar. Njësitë arsimore vendore dhe drejtorët e shkollave janë përgjegjës për zbatimin e këtij urdhri dhe për marrjen e masave sipas akteve normative në fuqi në rast të shkeljes së tij”, nënvizohet në urdhrin e ministres. Urdhri i ri është përshëndetur thuajse nga të gjithë, ndërsa ka dhe nga ata që e shikojnë zbatimin e tij me skepticizëm. Për disa mësues, problem përbëjnë edhe tabletat, mp3, laptopët apo diktofonët, të cilat sipas tyre duhet të ishin parashikuar në urdhër. Ndonëse nuk dihet ende sesi do të zbatohet ky urdhër, thuhet se do të ketë penalizime për shkelësit: konkretisht masë deri në përjashtim nga mësimi apo shkolla për nxënësit që përsërisin një sjellje të tillë si dhe pezullim e deri në përjashtim nga puna në rastin e mësuesve. Kjo nuk është një praktikë e re në botë. Vetëm pak ditë më parë, Parlamenti francez miratoi ligjin që ndalon përdorimin e smartphonëve dhe tabletëve për të gjithë nxënësit deri në moshën 15 vjeç në shkolla. Sipas ligjit, të gjitha pajisjet elektronike telefonike ose jo duhen lënë në shtëpi ose të mbahen të mbyllura deri në përfundim të mësimit.