Berisha kundër ndarjes së Kosovës, Thaçi shpërthen: I dhe naftë Millosheviçit
Ish- Kryeministri: Ndarjen e kanë kërkuar gjithmonë serbët. Presidenti: Burgose Adem Jasharin, strehove Bin Ladenin e Arkanin
Ish- Kryeministri Sali Berisha dhe Presidenti i Kosovës, Hashim Thaçi, kanë mbajtur qëndrime të ashpra dhe tërësisht të kundërta në debatin për kufijtë e Kosovës. Berisha në një takim të zhvilluar në zyrën e tij në Tiranë me një delegacion nga Lugina e Preshevës është shprehur kategorikisht kundër propozimit të Thaçit për rishikim të kufijve me Serbinë. Ish- Kryeministri ka kujtuar se ky është një propozim i hershëm i palës serbe dhe ka për qëllim copëtimin dhe ndarjen e Kosovës. Për Berishën, Kosova nuk i ka asnjë borxh Serbisë dhe asnjë pëllëmbë tokë të territorit të saj për të ndarë, duke kundërshtuar atë që e quan ide dhe përpjekje të Beogradit për Serbinë e Madhe në kurriz të Kosovës. Por duke “harruar” të gjitha vlerësimet e mëparshme në drejtim të Berishës, Thaçi në një reagim të fortë në profilin e tij në “Facebook” ka deklaruar se nuk pranon këshilla nga të dëbuar me votë masive nga skena politike dhe nga ata që në mes viteve 1992- 1997 tregtonin dhe bënin që me punët e tyre të pista të mbijetonte makineria ushtarake e Sllobodan Millosheviç.
SALI BERISHA Është fakt i pamohueshëm se Serbia gjithnjë ka dashur t’ju përdorë si plaçkë tregu dhe për shkëmbim territoresh. Personalisht, unë kam qenë dhe jam gjithnjë për paprekshmërinë e kufijve të Kosovës dhe çdo lloj copëtimi, ndarje apo tregtie me territorin e saj dhe kundër çdo diskutimi për këto çështje. Mendoj, se të njohësh të drejtën e Serbisë, fuqisë së humbur nga lufta, të paraqesë pretendime territoriale ndaj Kosovës është gabim i madh dhe historik, është në një farë mënyre një zhbërje e qëllimit dhe rezultatit të luftës dhe kapitullimit të Serbisë. Por kjo është edhe një zhbërje e Kosovës së çliruar në vitin 1999, të njohur në dokumentet ndërkombëtare dhe nga mbi 115 shtete, përfshi këtu 95% të vendeve të lira të botës. Theksova se Republika e Kosovës është shpallur dhe njohur si shtet i pavarur me kufijtë e saj aktualë ndërkombëtarë, ndaj Serbia nuk ka asnjë të drejtë dhe nuk duhet t’i njihet asnjë e drejtë për të pretenduar qoftë edhe një pëllëmbë toke të territorit të Kosovës. Duke theksuar se Kosova nuk i ka asnjë borxh Serbisë dhe se ajo nuk ka asnjë pëllëmbë tokë të territorit të saj, pasi e kundërta është e vërtetë, u shpreha se të pranosh idenë e ndarjes së Kosovës në një mënyrë apo në një tjetër mbështet idenë dhe përpjekjen e Beogradit për Serbinë e Madhe në kurriz të Kosovës. Në rajonin tonë, zona me tri komuna minoritare si Mitrovica janë disa dhe hapja e një precedenti që kërkojnë serbët në Mitrovicë do minonte paqen dhe stabilitetin në mbarë rajonin. Minoriteti serb në Kosovë, në përputhje me Dokumentin e Ahtisarit është shpallur superminoritet. Atij i janë dhënë dhe garantuar të drejta që nuk i ka asnjë minoritet në Europë, ndaj pretendimi i Serbisë për tri Komunat e Mitrovicës nuk ka të bëjë aspak me garantimin e lirive dhe te drejtave të serbëve, por ka të bëjë vetëm me vazhdimin e idesë së serbomadhisë dhe është pretendim territorial ndaj një shteti sovran të pavarur me qëllim zhbërjen e Kosovës! Theksova se nuk ka asnjë dallim edhe në rastin e “shkëmbimit” të territoreve, pasi kanë qenë serbët ata që kanë kërkuar gjithnjë dhe me insistim patologjik, edhe para shpalljes së pavarësisë së Republikës së Kosovës, ndarjen apo tregtinë me territoret e saj. E vërteta është se në këtë rast Serbia kërkon të bëjë tregti, të përdorë si plaçkë tregu territoret shqiptare, pasi ajo është e shqetësuar nga zgjimi gjithnjë e më i madh i vetëdijes kombëtare te banorët shqiptarë të Pazarit të Ri. Për të gjitha këto jam kategorikisht kundër dhe se kam bindje se këto përpjekje destabilizuese të Serbisë do të dështojnë. Theksova se çdo marrëveshje dhe çdo zgjidhje duhet të jetë një marrëveshje midis dy vendeve të pavarura që njohin dhe respektojnë integritetin territorial të njëri- tjetrit. Ju nuk duhet në asnjë mënyrë të bëheni shkak për këto pazare. Lugina duhet të jetë luginë paqeje, bastion i pamposhtur i vlerave, botës shqiptare dhe europiane, me qytetarë të barabartë para ligjit dhe në rast se Serbia nuk pranon këto parime, vetëkuptohet që ajo nuk kërkon marrëveshje, por konfliktualitet dhe destabilizim!
HASHIM THAÇI Jo ndarje të Kosovës, jo shkëmbim të territoreve, po bashkim të Preshevës, Medvegjës dhe Bujanovcit me Kosovën, në kuadër të korrigjimit të kufirit midis Kosovës dhe Serbisë, në procesin e dialogut për normalizimin e marrëdhënieve ndërshtetërore në mënyrë paqësore. Ky proces, nëse tregohemi të mençur dhe të bashkuar, do të përmbyllet me njohje reciproke Kosovë– Serbi dhe Kosova do të anëtarësohet në të gjitha organizatat ndërkombëtare: në BE, NATO dhe OKB. Nuk duhet t’i përsërisim gabimet siç na ndodhën me vonesën për themelimin e Ushtrisë së Kosovës apo dhe me votimin e vonuar të demarkacionit me Malin e Zi. Për procesin e dialogut dhe marrëveshjen paqësore, Kosova e ka mbështetjen e plotë të Bashkimit Europian dhe të Shteteve të Bashkuara të Amerikës. Në këtë rrugëtim të përbashkët, Kosova nuk do ta ketë asnjë mëdyshje, sepse liria dhe pavarësia e Kosovës është produkt i sakrificës sonë dhe i mbështetjes euroatlantike. Institucioneve të Republikës së Kosovës sot më së paku iu duhen këshillat e të dëbuarve me votë masive nga skena politike. Veçanërisht të atyre që në mes viteve 19921997 tregtonin dhe bënin që me punët e tyre të pista të mbijetonte makineria ushtarake dhe policore e kasapit të Ballkanit, Sllobodan Millosheviç. Ata, duke mbushur xhepat e tyre, u kujdesën me devotshmëri që rezervuarët e tankeve dhe autoblindave të jenë të mbushur plot, përkundër faktit se bashkësia ndërkombëtare kishte vënë sanksione kundër Millosheviçit. Nuk i duhen këshillat e atyre që strehuan Bin Ladenin, vrasësin e civilizimit botëror si dhe Arkanin, vrasësin e shqiptarëve të Kosovës. Nuk i duhen këshillat e atyre që burgosën komandantin legjendar Adem Jashari, si dhe komandantë të shquar si Fehmi e Xhevë Lladrovci, Zahir Pajazit, dhe UÇK- në e etiketuan si terroriste. Këta që sot kundërshtojnë vullnetin e shqiptarëve të Preshevës, Bujanovcit e Medvegjës për bashkim me Kosovën, janë të njëjtit që Presidenti Rugova për së gjalli nuk i lejoi ta shkelin tokën e Kosovës. Këshillat e tyre i takojnë kohës së turpit të historisë shqiptare.