“Opozita të zgjohet e të përshëndesë vendimin e NATO- s”
Kryetari i Grupit të PS- së, Taulant Balla, ka shfrytëzuar vendimin e Këshillit të Atlantikut të Veriut për ngritjen e bazës ajrore në Kuçovë, për të ironizuar qëndrimet e opozitës. Në një status në “Facebook”, Balla e ka quajtur vendimin e NATO- s si historik për Shqipërinë. Ndërkohë që ka thënë se opozita duhet të zgjohet nga gjumi dhe ta përshëndesë këtë vendim të rëndësishëm. “NATO merr vendimin historik për Shqipërinë, duke e shndërruar bazën e Kuçovës në bazë ajrore mbështetëse të NATO- s për furnizim ajror, mbështetjen logjistike, mbështetjen e policimin ajror, si dhe për trajnime dhe stërvitje të Aleancës së Atlantikut Verior. Ky vendim historik i Këshillit të Atlantikut vjen menjëherë pas Samitit të NATO- s në Bruksel 3 javë më parë, ku Presidenti Trump vlerësoi në mënyrë të veçantë Kryeministrin Rama për kuptimin dhe sinkronizimin me politikën amerikane të mbrojtjes. Uroj që edhe opozita të jetë zgjuar dhe ta përshëndesë këtë vendim historik për Shqipërinë”, shkruan Balla. Më tej, kreu i Grupit të PS- së ka thënë se investimi prej 50 milionë eurosh në Shqipëri, do t’i hapë një rrugë të rëndësishme zhvillimit ekonomik dhe social të zonës së Kuçovës. “Duke e vlerësuar Shqipërinë dhe Qeverinë e saj si partnerë të besueshëm, Këshilli i Atlantikut të Veriut ka miratuar vendimin për të ndërtuar në Shqipëri bazën e parë ajrore të NATO- s në Ballkanin Perëndimor. Në njoftimin zyrtar konfirmohet se NATO do të investojë mbi 50 milionë euro, vetëm për fazën e parë të projektit për modernizimin e bazës ajrore të Kuçovës, duke hapur një histori të re për zhvillimin ekonomik e social të gjithë zonës dhe rajonit ku planifikohet ndërtimi i kësaj baze të re ajrore”, ka thënë Balla.