S’ka të ndalur droga drejt Greqisë, 17 pako në makinë
Arrestohet i riu nga Memaliaj, në gomën rezervë 7 kg kanabis
S’ka të ndalur trafiku i drogës drejt Greqisë. Dje, Policia Kufitare e Kakavijës arrestoi një 32- vjeçar nga Memaliaj, i cili kishte fshehur në automjetin e tij një sasi lënde narkotike kanabis sativa, në tentativë për ta trafikuar atë drejt shtetit fqinj.
I riu e kishte fshehur sasinë prej 7 kilogramësh, të paketuar në 14 pako, brenda gomës rezervë. Menjëherë pas konstatimit të drogës, i riu me inicialet S. H. ka tentuar të mohojë akuzën e ngritur ndaj tij. Ai ka theksuar se nuk kishte dijeni për sasinë e drogës, e cila ishte fshehur në gomën rezervë të mjetit të tij dhe se ishte nisur për të vizituar për pak ditë të afërmit që jetojnë në shtetin grek. “Nuk di kush e ka vendosur drogën këtu. Unë nuk kam dijeni fare për të”, mësohet të jetë shprehur 32- vjeçari në momentin e ndalimit. Por pavarësisht pretendimit të tij, blutë e Gjirokastrës e kanë arrestuar atë me akuzën e trafikut të narkotikëve.
“Shërbimet e Policisë Kufitare kanë përzgjedhur për kontroll më të detajuar në vijë të dytë automjetin “Toyota Rav”, që drejtohej nga shtetasi S. H. 32 vjeç, banues në Memaliaj, i cili udhëtonte për në Greqi. Nga kontrolli i detajuar i kryer nga punonjësit e Policisë Kufitare, në vijën e dytë ka rezultuar se në gomën rezervë kishte të fshehura disa pako të mbështjella me letër natriban, të cilat dyshohet se janë të mbushura me lëndë narkotike kanabis sativa. Menjëherë është njoftuar grupi hetimor, ku kanë mbërritur specialistët për Hetimin e Narkotikëve në Drejtorinë Vendore të Policisë Gjirokastër. Nga veprimet e kryera nga grupi hetimor rezultoi se në brendësi të gomës rezervë kishte 14 pako me lëndë narkotike kanabis sativa, me peshë rreth 7 kilogramë gjithsej, e cila është sekuestruar në cilësinë e provës materiale, bashkë me automjetin”, thuhej në njoftimin e Policisë.
Sipas Policisë, drejtuesi i mjetit është shoqëruar në ambientet e Drejtorisë Ven- dore të Policisë Gjirokastër, ku në përfundim të veprimeve të kryera nga specialistët për Hetimin e Narkotikëve u bë arrestimi në flagrancë për veprën penale “Trafikimi i narkotikëve”. Arrestimi i të riut memaliot u krye vetëm një ditë pasi policia kreu një operacion në afërsi të fshatit Leshnje, në një zonë mes shkurresh e pemësh, në afërsi të shtratit të lumit Vjosa. Në dy furgonë të bardhë të markës ‘ Mercedes Benz’, me targa të falsifikuara u gjetën 1 ton e 463 kilogramë lëndë narkotike kanabis sativa si dhe 16 armë zjarri ( 1 snajper, 12 kallashnikovë, 2 pushkë dhe 1 armë gjahu).