Nexhmije Hoxha: Enveri ishte për bashkëpunim me Ballin
“Ftoi nacionalistët të merrnin pjesë në Kongresin e Përmetit”
Bashkëshortja e Enver Hoxhës, Nexhmije Hoxha i cilëson pseudohistorianë ata që pretendojnë se Enver Hoxha hodhi poshtë marrëveshjen e Mukjes sepse nuk donte bashkimin me Kosovën.
“Nuk është aspak e vërtetë se Mukja u prish për çështjen e Kosovës dhe janë krejt pa baza mendimet që hidhen nga pseudohistorianë, se gjoja Enveri e shiti Kosovën në Mukje. Jo vetëm në rastin e Mukjes, por në vijimësi e deri në fund të jetës Enveri ka menduar e luftuar për Kosovën”, është shprehur zonja Hoxha. Duke folur për gazetën “Dita”, Nexhmije Hoxha shprehet se udhëheqësi komunist ka kërkuar vazhdimisht bashkëpunim me nacionalistët dhe grupimet e tjera, që ishin pozicionuar kundër pushtuesit. “Është e vërtetë që anglezët ishin shumë të interesuar që të gjitha forcat politike të kohës, përfshi edhe Ballin Kombëtar, të merrnin pjesë aktivisht në luftën për çlirimin e vendit. Edhe Partia Komuniste këtë dëshironte. Janë dokumente të panumërta të Enverit në atë kohë, që ai e theksonte vazhdimisht këtë. Unë kam disa letra të Enverit të asaj kohe, ku ai është shprehur fare qartë. Që Enveri ka dashur dhe ka kërkuar edhe pas Mukjes që, jo vetëm ata që ishin të lidhur ngushtë me Partinë Komuniste dhe forcat partizane, por edhe grupime të tjera, sidomos nacionalistët, të përfshiheshin në luftë me armë në dorë kundër pushtuesve”, është shprehur zonja Hoxha. Sipas saj, Enver Hoxha i ftoi nacionalistët dhe në kongresin e Përmetit. “Mjafton të kujtoj këtu që ai i ka ftuar këto forca të merrnin pjesë me përfaqësuesit e tyre edhe në Kongresin e Përmetit, që në atë kohë ai e quante parlament. Pra, edhe pas 11 muajsh pas Mukjes, Enveri dhe Partia Komuniste ishin për bashkëpunim me të gjitha forcat që e donin të mirën e Shqipërisë, natyrisht përjashto kuislingët dhe ata që kishin kryer krime kundër popullit e vendit të tyre”, thotë Nexhmije Hoxha. Pak ditë më parë, historiani Uran Butka, në një shkrim për 75 - vjetorin e Kuv- endit të Mukjes, shkruan se Enver Hoxha e prishi atë marrëveshje nën ndikimin e jugosllavëve. “Enver Hoxha, nën presionin e emisarëve të PKJ- së në Shqipëri, prishi dhe shkeli në mënyrë të njëanshme dhe arbitrare Marrëveshjen e Mukjes. Marrëveshja e Mukjes prekte sidomos interesat dhe synimet e qarqeve shoviniste serbomëdha që sundonin në PKJ, të cilat kërkonin përjetësimin e pushtimit serb të Kosovës e të viseve të tjera shqiptare, si edhe nënshtrimin e plotë të Shqipërisë ndaj Jugosllavisë. Prandaj edhe prishja e njëanshme e Marrëveshjes së Mukjes ishte kryesisht rezultat i ndërhyrjes jugosllave , të cilës nuk i interesonte kurrsesi marrja dhe plotësimi i atyre vendimeve. Reagimi i shpejtë e i vendosur i kolonit malazez në Kosovë, M. Popoviçit, ishte i kuptueshëm. Kur aktet e marrëveshjes së Mukjes iu dorëzuan “mentarit” të Enverit, ai i tërbuar i grisi ato, i bëri copë- copë dhe ia hodhi në surrat Enver Hoxhës”, shkruan Butka.