Pas Dedjas, ONM kërkon apelim edhe për Zaganjorin
Komisioneri Publik pritet të apelojë vendimin edhe për Zaganjorin
Operacioni Ndërkombëtar i Monitorimit nuk është dakord me Komisionin e Pavarur të Kualifikimit sa i takon kalimit në veting të Xhezair Zaganjorit.
Ky i fundit, i cili është kryetar i Gjykatës së Lartë, u rikonfirmua në detyrë nga KPK- ja në muajin korrik, duke iu nënshtruar vetëm vlerësimit mbi kriterin e pasurisë. Mirëpo, ONMja nuk është e bindur, ashtu sikurse edhe me Bashkim Dedjan e Gjykatës Kushtetuese, për të cilin rekomandoi te Komisioneri Publik apelimin e vendimit të Komisionit të Pavarur të Kualifikimit. Përmes një deklarate për mediat, Komisioneri Publik njoftoi dje se ka marrë rekomandime nga ONM për apelimin e vendimit të Komisionit të Pavarur të Kualifikimit për Zaganjorin. “Në datë 24.07.2018, në përfundim të seancës dëgjimore përkatëse, Komisioni i Pavarur i Kualifikimit vendosi konfirmimin në detyrë të subjektit të rivlerësimit, z. Xhezair Zaganjori, me detyrë kryetar i Gjykatës së Lartë. Më datë 06.08.2018, Operacioni Ndërkombëtar i Monitorimit u ka paraqitur Komisionerëve Publikë rekomandimin për ta ankimuar në Kolegjin e Posaçëm të Apelimit vendimin e Komisionit të Pavarur të Kualifikimit për konfirmimin në detyrë të z. Xhezair Zaganjori. Komisionerët Publikë, pasi t’u jetë njoftuar vendimi me shkrim i Komisionit të Pavarur të Kualifikimit, do ta shqyrtojnë atë krahas rekomandimit të Operacionit Ndërkombëtar të Monitorimit. Bazuar në pikën 7 të nenit 55 të ligjit nr. 84/ 2016 “Për rivlerësimin kalimtar të gjyqtarëve dhe prokurorëve në Republikën e Shqipërisë”, Komisioni i Pavarur i Kualifikimit ka 30 ditë afat për t’ua njoftuar vendimin me shkrim Komisionerëve Publikë. Ky vendim ende nuk është njoftuar. Bazuar në pikën 1 të nenit 63 të ligjit nr. 84/ 2016 “Për rivlerësimin kalimtar të gjyqtarëve dhe prokurorëve në Republikën e Shqipërisë”, Komisionerët Publikë brenda 15 ditëve nga data e njoftimit të vendimit nga Komisioni i Pavarur i Kualifikimit, kanë të drejtë të paraqesin ankim pranë Kolegjit të Posaçëm të Apelimit”, shkruan ndër të tjera deklarata e Komisionerit Publik.
RIVLERËSIMI Vendimi për rikonfirmimin e Zaganjorit në detyrë u mor nga trupi gjykues i përbërë nga Olsi Komici, relatore Pamela Qirko dhe anëtar Roland Ilia. Ata ngritën pikëpyetje për Zaganjorin më 20 korrik, kur u zhvillua edhe seanca dëgjimore, teksa e akuzuan gjyqtarin për deklarime të pasakta dhe kontrata fiktive, me qëllim shmangien e tatimeve. Hetimi u përqendrua vetëm tek apartamenti me sipërfaqe 293 metra katrorë. Ai ishte deklaruar në vlerën 7.4 milionë lekë në deklaratën periodike të vitit 2003 dhe 5.8 milionë lekë në deklaratën “veting”. Mirëpo, sipas deklaratës noteriale të gjetur në ZVRPP, kjo pronë është deklaruar se është blerë për 500 mijë lekë. “Kontratat janë fiktive, po, por janë brenda ligjit dhe janë bërë vetëm që unë të regjistroj pronën në emrin tim. Unë kam dhënë para për ndërtimin e saj, nuk kam blerë gjë”, tha Zaganjori në seancën e 20 korrikut. “Fitimi i pronësisë për këtë pronë është shumë i qartë, që në vitin 1997 me krijimin e sendit. Në vitin 2001 u bë formalizimi për t’i futur këto prona në qarkullimin civil”, shtoi ai më tej.