Masat e Policisë, asnjë aksident i rëndë gjatë fundjavës

Apeli i pak ditëve më parë që drejtori i Policisë Rrugore, Mithat Tola, u bëri drejtuesve të mjeteve dhe këmbësorëve, duket se nuk ra në vesh të shurdhër. Gjatë fundjavës që kaloi, në të gjithë territorin e vendit nuk ndodhi asnjë aksident me vdekje. Një tregues ky mjaft pozitiv në këto ditë sezoni turistik, ku llogaritet një dyndje automjetesh dhe turistësh. Siç u shpreh vetë drejtori Tola, vetëm më datë 4 gusht, nga Pikat e Kalimit Kufitar kanë hyrë në territorin e Shqipërisë mbi 53 mijë shtetas dhe kanë tranzituar po në këto pika për në Shqipëri mbi 12 300 mjete. Gjatë një dalje publike, kreu i Policisë Rrugore falënderoi të gjithë ata drejtues mjetesh, që gjatë fundjavës kanë udhëtuar në drejtim të qyteteve bregdetare dhe zonave turistike, për sjelljen në trafik dhe respektimin e normave të sjelljes, duke e bërë punën e Policisë Rrugore më të lehtë këtë fundjavë. Ndërsa deklaroi se gjatë fundjavës që sapo kali, falë masave shtesë të marra dhe bashkëpunimit mes efektivëve të Policisë Rrugore dhe përdoruesve të rrugës, nuk u regjistrua asnjë aksident rrugor me pasoja serioze për jetën, në zonat turistike. "Për 3 ditë, Drejtoria e Policisë Rrugore, falë bashkëpunimit intensiv me radiot me shtrirje kombëtare, komunikoi informacion të detajuar te drejtuesit e mjeteve në lidhje mbi rrjedhshmërinë e trafikut, ngarkesën dhe bllokimet ose ngadalësimet e tij, si dhe rrugët alternative kur pati mbingarkesë. Gjithashtu nëpërmjet mediave lokale dhe rrjeteve sociale, 12 drejtuesit e shërbimeve të Policisë Rrugore komunikuan dhe do të vijojnë ta bëjnë këtë, për çdo sqarim dhe kërkesë të qytetarëve në lidhje me informacionin për trafikun", u shpreh Tola. Ndërsa, krahas të dhënave për menaxhimin e lëvizjes, ai bëri edhe një përmbledhje të rezultateve të masave, në kuadër të parandalimit të ngjarjeve me pasoja të rënda në akset rrugore. Sipas drejtorit të Policisë Rrugore, gjatë fundjavës janë arrestuar 58 shoferë, nga të cilët, 21 për drejtim mjeti në gjendje të dehur dhe 37 për mungesë të lejes së drejtimit. Policia ka pezulluar 254 leje drejtimi, për tejkalim të limiteve të shpejtësisë dhe drejtim mjeti nën ndikimin e alkoolit etj.. Ndërsa për mbi 7800 drejtues mjetesh janë vendosur masa administrative për shkelje të Kodit Rrugor.