Maxhoranca përjashtoi gjyqtarët nga profesioni i avokatit
Maxhoranca miratoi propozimin e saj për të mos lejuar prokurorët dhe gjyqtarët, që penalizohen nga vetingu, të punojnë si avokatë. Projektligji "Për profesionin e avokatit në Republikën e Shqipërisë" mori 75 vota në seancën e fundit parlamentare të sesionit që u mbyll. Sipas propozimit të Taulant Ballës, të përjashtuarit nga sistemi i drejtësisë, gjyqtarë dhe prokurorë nuk mund të bëhen avokatë, ndryshe nga sa propozoi Komisioni i Ligjeve. Në seancë, kryetari i Grupit të PS- së, Balla u shpreh se do i drejtohemi me një shkresë edhe Komisionit të Venecias nëse shkelen të drejtat e njeriut pas vendimit për të përjashtuar të përjashtuarit nga vetingu. Ndërkohë që kundër përjashtimit votuan Spartak Braho dhe Elena Xhina. "Edhe ligji që votuam për avokatinë dhe amendamenti i propozuar nga unë dhe Manja është hap i rëndësishëm drejt garantimit të moralit dhe pastërtisë së atyre. Amendamenti garanton që personat, që kanë qenë pjesë e sistemit të drejtësisë dhe largohen nga vetingu për një kohë të caktuar, nuk mund të punojnë si avokatë. Do të marrim në kohë edhe një vlerësim nga Komisioni i Venecias", tha Taulant Balla. Kur ky propozim u diskutua për herë të parë në Komisionin e Ligjeve, Maks Haxhia, kreu i Dhomës së Avokatisë pati një qasje pozitive. "Do të kemi 3 kategori të larguarish nga vetingu, do të jenë të paaftit, me figurë jo të pastër dhe të korruptuarit. Mendoj që do të jetë një qëndrim i diferencuar. Një gjyqtar, një prokuror, që është larguar për korrupsion, nuk mund të jetë sepse barazohet me atë që janë të dënuar për vepra penale", është shprehur avokati Maks Haxhia.