Aksident tragjik në Tiranë, makina godet kalimtarët, 2 të vdekur, 2 të plagosur
Shoferja 38- vjeçare humb kontrollin e mjetit, përplas nënën me dy fëmijë në trotuar, vdes vajza 7- vjeçare, vajza tjetër rëndë
Një aksident i rëndë me pasojë dy të vdekur e dy të plagosur ndodhi mëngjesin e djeshëm, pranë Urës së Institutit Bujqësor, në Tiranë.
Një shofere 38- vjeçare, e pajisur me patentë prej 5 vitesh, ka humbur kontrollin e mjetit, duke përplasur një të ri me biçikletë dhe më pas një nënë me dy vajza të mitura që ndodheshin në trotuar. Për pasojë, kanë humbur jetën në vend çiklisti 29- vjeçar dhe njëra nga vajzat e mitura, që ishte e shoqëruar me nënën dhe motrën. Ngjarja tragjike ndodhi rreth orës 08: 40, në afërsi të shinave të trenit, në vendin që njihet si Kthesa e Kamzës. Drejtuesja e mjetit, Rozina Koleci, nga Mati dhe banuese në Zall- Herr, ka qenë duke lëvizur nga Tirana në drejtim të Kamzës dhe në një moment është përfshirë në një përplasje mjetesh. Ekspertët tregojnë se drejtueses i ka dalë situata nga kontrolli edhe për shkak të eksperiencës jo të mjaftueshme në drejtimin e mjetit, pasi në rast se do të kishte frenuar, ngjarja mund të ishte pa pasoja. Por në fakt ka ndodhur e kundërta. Pasi ka goditur mjetin e parë, ajo i ka dhënë gaz mjetit, duke goditur të dytën, të tretën, më pas çiklistin dhe kalimtarët. Burimet thanë se mjeti është ndalur vetëm nga përplasja me makinat e tjera në rrugë, pasi bilanci i aksidentit mund të kishte qenë edhe më i rëndë.
VIKTIMAT Dy persona kanë ndërruar jetë menjëherë dje në mëngjes, pasi janë përplasur nga automjeti tip “Mercedez Benz”, me targë AA 071 UA, që drejtohej nga 38- vjeçarja Rozina Koleci. I pari ka qenë 29- vjeçari Ramazan Isha, 29 vjeç, i cili është goditur në rrugë nga makina dhe ka humbur jetën në vend. Makina ka marrë para biçikletën me forcë, duke e ngjitur në xhamin e parë e më pas i riu është përplasur fort në asfalt. Menjëherë pas tij, automjeti që kishte humbur kontrollin ka përplasur në trotuar edhe nënën 29- vjeçare Valbona Ndreu, e cila po ecte bashkë me dy vajzat e mitura, 7 dhe 6 vjeçe. Si pasojë e përplasjes së fortë, vajza 7- vjeçare me inicialet E. N., ka ndërruar jetë në vend, duke mbetur e vdekur para gomave të para të makinës. Nëna bashkë me vajzën tjetër kanë mbetur të plagosura rëndë dhe janë transportuar drejt Spitalit të Traumës. Burimet thanë se 6- vjeçarja ka disa plagë në kokë e për këtë arsye pritet t’i nënshtrohet një ndërhyrjeje neurokirurgjikale. Ndërsa nëna e saj është në gjendje më të stabilizuar. Vetë drejtuesja e automjetit që shkaktoi aksidentin ka pësuar vetëm disa plagë të lehta në fytyrë. Ajo është arrestuar në vendin e ngjarjes, ndërsa ende nuk ka dhënë deklarime para oficerëve të Policisë, për shkak të gjendjes së rëndë psikologjike.
DINAMIKA Përveç këqyrjes së vendit të ngjarjes, matjeve dhe ekspertizës nga specialistët e Policisë Rrugore, për ndërtimin e skenës së ng- jarjes kanë ardhur në ndihmë edhe pamjet e disa kamerave sigurie që janë sekuestruar nga Policia. Sipas pamjeve filmike, automjeti që drejtonte Rozina Koleci është përplasur fillimisht me një mjet para saj. Më pas ka goditur një automjet të dytë e pas tij një të tretë. Nga pamjet duket se shoferja lëshon timonin dhe në vend që të frenojë i jep gaz makinës, duke përplasur çiklistin, që ende nuk është verifikuar plotësisht nëse po kalonte nga njëra anë e rrugës në tjetrën, apo paralel me automjetin. Në fund makina përplas në trotuar edhe nënën me dy vajzat e mitura, duke u ndalur vetëm pasi përplas një furgon.