Tragjedia në Itali, 35 të vdekur e 10 të zhdukur nga shembja e urës në autostradë
URA ISHTE NE RIKONSTRUKSION, S’KA SHQIPTARE MES VIKTIMAVE
Një tragjedi ka përfshirë Italinë gjatë ditës së martë, kur një sektor i konsiderueshëm i një ure- autostradë të rëndësishme në Genova u shemb rreth orës 11: 50, duke shkaktuar mbi 30 të vdekur.
Ishin tre mjete të rënda dhe mbi 30 makina në urë në kohën kur ajo u shemb, të cilat kanë rënë nga një lartësi mbi 90 metra. Punëtorët e ndërhyrjes së shpejtë kanë arritur të nxjerrin nga rrënoja e urës katër persona të gjallë. Por, 35 të tjerë kanë humbur jetën, mes tyre edhe një fëmijë dhjetëvjeçar. Janë 16 të plagosur dhe dhjetë të zhdukur. Kryeministri italian, Giuseppe Conte, ka shkuar pasditen e së martën në vendngjarje. Zv/ ministri për Infrastrukturën, Edoardo Rixi, tha se: “E gjitha ura ‘ Morandi’ do të shembet dhe ka pasoja të mëdha për trafikun dhe probleme për qytetarët dhe bizneset”. Prokuroria e Genovas po heton për shkatërrim dhe vrasje të shumëfishtë. Pasojat mbi ekonominë në Genova, për momentin, janë të pallogaritshme. Janë 440 banorë që u detyruan të largohen nga shtëpitë e tyre pasi pjesë të shembura të urës kishin rënë mbi to. Në ekipet e ndërhyrjes së shpejtë janë përfshirë mbi 1 000 njerëz, mes tyre karabinierë, zjarrfikës dhe ushtarë. Një pjesë e urës “Morandi” është shembur mbi një zonë industriale, duke rritur shqetësimet se mund të jenë dëmtuar linjat e gazit. Një zyrtare e zjarrfikësve, Amalia Tedeschi, tha se nga ura janë shembur rreth 74 metra. Infrastruktura e quajtur ura “Morandi” ishte ndërtuar nga inxhinieri Riccardo Morandi dhe ishte inauguruar në viti 1967. Prej më shumë se 50 vitesh ajo ishte shumë funksionale. Por banorët e qytetit kishin gjithnjë frikë nga ura e vjetër, siç kanë dëshmuar pas shembjes së saj. Ura lidhte Italinë me Francën dhe resorte të shum- ta turistike, në një kohë kur shumica e europianëve janë me pushime. Pjesa kryesore e urës që lidh autostradën A10 shkon drejt Francës, ndërsa ajo me autostradën A7 drejt Milanos. Ura ishte 1.1 km e gjatë. Në vitin 2016, Antonio Brencich, profesor i inxhinierisë civile në Universitetin e Genovas, paralajmëroi se mirëmbajtja e urës “Morandi” ishte aq e kushtueshme sa do të binte më lirë të ndërtojë një urë të re. Në artikullin e përmendur nga “Il Tempo”, profesor Brencich tha se çështja që ura ishte e pabarabartë dhe gjysmëhorizontale e kishte dëmtuar urën që në vitet ’ 80. Puna rikonstrukturuese e urës ka nisur në vitin 2016. Operatori i autostradave tha se në kohën e shembjes po kryhej punë për ristrukturimin e urës, duke shtuar se ajo ishte vazhdimisht e monitoruar. Mirëmbajta e urës ishte marrë përsipër nga “Atlantia S. P. A.”, një degë e “Autostrade Italia”. Aksionet e saj ranë me 11 pikë që pas rrëzimit të urës. “’ Autostrade Italia’ menaxhon rreth 3000 kilometra rrugë në Itali. Kjo komani investon gjithashtu në infrastrukturë në Kili, Indi, Brazil dhe aeroporte në Itali dhe Francë. Shefi ekzekutiv i “Atlantia”, Giovanni Castellucci, tha se kompania nuk kishte marrë asnjë raportim specifik se kishte rreziqe në lidhje me qëndrueshmërinë e urës. Sipas kompanisë, shembja e urës ishte e papritur dhe e paparashikuar.