Janë 39 viktima, hiqet koncesioni për mirëmbajtësit
Reagon “Autostrade per l’Italia”: Do të tregojmë se e kemi kryer me korrektësi detyrimin
Qeveria italiane ka nisur një ofensivë kundër kompanisë “Austostrade d’Italia” të zotëruar nga “Benetton”, e cila ka degë të saj kompaninë “Atlantia”, që kishte në dorë koncesionin për urën ku ndodhi tragjedia të martën.
Numri i të vdekurve është rritur në 39 vetë. Zëvendëskryeministri italian, Luigi Di Maio, tha se krerët e kompanisë duhet të japin dorëheqjen për këtë tragjedi që u shkaktua ndërkohë që ura mbikëqyrej prej tyre. “Nuk e kanë bërë mirëmbajtjen”, tha ai. Kryeministri Giuseppe Conte tha se nuk mund të presë hetimet, por do të vendosë menjëherë heqjen e koncesionit të rrugëve për kompaninë “Autostrade per l’Italia”. Deklarata e tij u bë menjëherë pas takimit të jashtëzakonshëm të Këshillit të Ministrave në prefekturën e Genovas, pas tragjedisë në segmentin A10 të urës “Morandi”. “Kemi dekretuar gjendjen e jashtëzakonshme për 12 muaj dhe do të ndajmë 5 milionë euro nga fondet e emergjencës nacionale. Tragjedi si kjo janë të papranueshme në një shoqëri moderne dhe nuk duhet të ndodhin, do të bëjmë gjithçka të mundur për të evituar që kjo të ndodhë sërish. Për këtë kërkojmë heqjen e koncesion- it të “Autostrade per l’Italia”, nuk mund të presim kohën që do të zgjasë gjykimi penal, kemi detyrimin për të garantuar udhëtim të sigurt për qytetarët. Nuk ka dyshim që kompanisë ‘ Autostrade’ i takonte të mirëmbante çdo pjesë të rrugës përgjatë urës”, tha Kryeministri Conte. Edhe zyrtarët e tjerë të qeverisë kane reaguar të revoltuar ndaj tragjedisë dhe kompanisë që duhej të garantonte sigurinë e urës. Ndërkohë, janë publikuar pamje të segmenteve të urës pak para tragjedisë, ku dukej se sa e holluar dhe me hekura që vareshin ishte një pjesë e saj pak javë para se të ndodhte ngjarja. Me gjithë presionin nga ngjarja dhe qeveria, drejtues të kompanisë përgjegjëse për mirëmbajtjen e urës nuk kanë pranuar të japin dorëheqjen, por aksionet e saj kanë rënë në pikiatë. Ndërkohë kompania “Autostrade per l’Italia”, e cila kujdeset për gjysmën e rrugëve në Itali, por edhe në vende të tjera të botës, tha se: “Shprehim besimin se do të tregojmë që i kemi kryer gjith- një me korrektësinë e duhur detyrimet tona si koncesionarë, duke marrë parasysh parashikimin kontradiktor në rregullat kontraktuale që do të ndodhë gjatë muajve të ardhshëm. Është një besim që bazohet në monitorimin e mirëmbajtjes së kryer në standarde ndërkombëtare”. Në kërkimin e fajtorëve për këtë tragjedi, disa ekspertë kanë drejtuar edhe gishtin nga mafia italiane, e cila, në mesin e viteve ’ 60, kur është ndërtuar ky projekt, kishte nën kon- troll industrinë e ndërtimit të infrastrukturës. Sipas disa ekspertëve në media ndërkombëtare, për ndërtimin e kësaj ure mund të mos jenë përdorur materiale të standardeve të duhura.