Kërkimet për të mbijetuar, me pajisje të teknologjisë së lartë
Përpjekjet për të gjetur të mbijetuar apo trupa në urën e shembur në Genova, po ndihmohen edhe nga pajisje të teknologjisë së lartë që janë ofruar nga Milano. Dhe pse shërbejnë njëkohësisht për “ruajtur” zonën e krimit, pajisjet e përdorura gjatë ditës së fundit në pjesën e shembur të urës “Morandi” kanë në fokus kryesor mosrrezikimin e jetëve, pasi ka ende të pagjetur nga tragjedia. Nga Policia Shkencore shprehen për mediat italiane se kanë marrë një pajisje të veçantë, që lejon lehtësime me transmetimin e imazheve nga 12 kënde të ndryshme, direkt e në qendër të operacioneve. Një sistem që do t’i lejojë shkencëtarët të përshpejtojnë procedurat e “pastrimit” të strukturës. Përgjatë brigjeve të rrjedhës së lumit Polcevera është njoftuar mbërritja e automjeteve të rënda të specializuara për punën në rrënoja. Në zonën lindore të shembjes, aty ku ndodhet pjesa më e madhe e rrënojave, janë dy vinça të mëdhenj të përdorur nga ekipet e shpëtimit për të kapur shtyllat më të mëdha që janë rrëzuar dhe që pengojnë punën e zjarrfikësve. Qëllimi, siç shpjegohet nga krerët e zjarrfikësve dhe të mbrojtjes civile, është për të mbajtur sa më shumë të plotë të ashtuquajturin vend të krimit, për të mos ndryshuar shumë gjendjen e zonës, që sipas ekspertëve do të kërkohet nga Prokuroria, siç u shpjegua mëngjesin e së mërkurës nga Kryeprokurori Francesco Cozzi, i cili donte ta vizitonte zonën personalisht. Një ndërhyrje më energjike ka shumë të ngjarë të ishte fatale, duke marrë parasysh se mund të ketë ende persona të gjallë nën rrënoja ( operacioni zyrtarisht është ende për shpëtimin e njerëzve dhe jo vetëm për kërkimin e kufomave). Veç kësaj, lëvizjet e pakujdesshme mund të shkaktojnë një efekt të rrezikshëm domino në rrënoja, me alarme të panjohura.