Paralajmërimi i PD: Do të anulojmë koncesionin e dështuar të ‘ check- up’

Partia Demokratike do të anulojë koncesionin e check up- it kur të vijë në pushtet. Deputeti i PD- së, Bardh Spahia, iu referua gjetjeve të raportit të Kontrollit të Lartë të Shtetit kur e cilësoi koncesionin e check up- it të dështuar dhe korruptiv. “Kontrolli i Lartë i Shtetit provoi si plotësisht të vërtetë denoncimin e Partisë Demokratike se koncesioni i check- up- it është simboli i korrupsionit të koncesioneve të qeverisë “Rama”. Raporti i KLSH- së konfirmon se, pavarësisht se analizat e check up- it i ka kryer vetëm 26 % e popullsisë, kompania e Vilma Nushit, kliente dhe sponsore e Edi Ramës, është paguar me 22 milionë euro, 7 milionë prej të cilave për analiza të pakryera kurrë. Ky abuzim skandaloz me taksat e shqiptarëve për një shërbim të padhënë është vënë në dukje për të dytin vit radhazi edhe nga Kontrolli i Lartë i Shtetit, duke theksuar dy linja korruptive që favorizojnë kompaninë sponsorizuese të Kryeministrit. Linja e parë është pagesa prej 2.1 milionë euro në vit, që KLSH e klasifikon si dëm në buxhet, sepse koncesioni i Vilma Nushit është paguar për rreth 145 mijë vizita të pakryera. Linja e dytë korruptive është një skandal po aq i madh, që implikon Drejtorinë e Tatimeve, e cila, sipas KLSH- së, ka rimbursuar 1.8 milionë euro TVSH, për koncesionarin e check up- it, pavarësisht se ligji i përjashton shërbimet shëndetësore nga detyrimet tatimore”, tha Spahia. Deputeti i PD theksoi se kur demokratët të vijnë në pushtet, do të anulojnë këtë dhe çdo koncesion tjetër korruptiv të firmosur nga qeveria Rama. “Partia Demokratike është e vendosur të anulojë koncesionin e dështuar të check- up dhe çdo koncesion tjetër korruptim. Me ligjin e ndryshuar antimafia, çdo pasuri dhe qindarkë e grabitur, do t’u kthehet shqiptarëve”, theksoi deputeti i PD.