Gjobiten 95 shoferë, u filmuan me celularë në timon
Policia: Gjatë 48 orëve u bllokuan 82 mjete, ishin debitorë
Policia e Tiranës ka vijuar kontrollet me efektivë me uniformë e civilë në rrugët urbane, me objekt kryesor një sërë shkeljesh të rrezikshme dhe shqetësuese për përdoruesit e rrugës.
Objekt i verifikimit në zbatim të planit të masave të Policisë Rrugore ka qenë kryesisht përdorimi i celularit gjatë drejtimit të mjetit, mospërdorimi i kaskës mbrojtëse nga drejtuesit e motorëve dhe çiklomotorëve, mospozicionimi në korsinë e duhur të lëvizjes, kryesisht në kryqëzimet kryesore të kryeqytetit. Kësaj here objekt i agjentëve civilë, që kanë si detyrë fotografimin e filmimin e shkeljeve, ka qenë edhe qarkullimi në korsitë e dedikuara për shërbimin publik dhe biçikletat, respektimi i sinjalizimit rrugor etj. Policia tha dje se kontrollet në funksion të këtij plani janë shtrirë në të gjitha rrugët dhe kryqëzimet e evidentuara si problematike ndaj këtij fenomeni, të alternuara përgjatë 48 orëve të fundit, nga të cilat janë konstatuar dhe proceduar administrativisht dhjetëra drejtues mjetesh. GJOBAT E ARRESTIMET
Vetëm për përdorim celulari gjatë drejtimit të automjetit, janë fotografuar e më pas gjobitur nga Policia Rrugore 95 shoferë, si dhe 58 drejtues motomjetesh për mospërdorim të kaskës mbrojtëse. Policia ka ndëshkuar me masa administrative 76 shoferë, të cilët janë pozicionuar në vendin e gabuar, në zonat e kryqëzimeve kryesore. Ndërsa 36 shoferë janë gjobitur për qarkullim në korsinë e dedikuar për shërbim publik dhe në atë të biçikletave. Për shkelje të semaforit janë ndëshkuar administrativisht 15 shoferë, ndërsa janë bllokuar për detyrime të pashlyera 82 makina. Policia Rrugore ka arrestuar në flagrancë 9 drejtues mjetesh, nga të cilët 3 që kanë rezultuar në gjendje të dehur dhe 6 që nuk kanë qenë të pajisur me leje drejtimi.
PROJEKTI Pas aksidentit tragjik që ndodhi disa ditë më parë në Tiranë, ku humbën jetën 2 persona, Policia Rrugore ka vënë në jetë një plan të ri për të “frikësuar” drejtuesit e automjeteve, që nuk respektojnë rregullat e qarkullimit. Projekti ka të bëjë me vëzhgimin e fshehtë nga agjentë civilë, të shoferëve që përdorin celularin gjatë drejtimit të mjetit. Ata i fotografojnë dhe më pas efektivët e Qarkullimit vendosin masat administrative sipas sanksioneve që parashikon Kodi Rrugor. Kështu ka ndodhur në orë të ndryshme gjatë dy ditëve të fundit në disa prej rrugëve të kryeqytetit. Policë civilë, të vendosur me shërbim në disa pika strategjike, kanë fotografuar të paktën 95 shoferë që flisnin në celular. Të gjithë janë ndëshkuar me gjoba nga Policia Rrugore. Ndërsa për të qenë transparentë me publikun, Policia e Tiranës e ka bërë publik një fakt të tillë, duke ua bërë të qartë shoferëve që po i vëzhgon. Madje, ka edhe një thirrje për ta: “Respekto rregullat e qarkullimit rrugor! Mos harro, polici po të vëzhgon!”