Armë, drogë e motorë mjetesh detare, arrestohet 25- vjeçari nga Llakatundi
VLORE- Policia e Vlorës zhvilloi dje operacionin e koduar "Mercury" në Llakatund të Vlorës dhe arrestoi një të ri me armatim, drogë, motorë uji për mjete ujore, disa automjete, fishekë etj. Policia e nisi operacionin për arrestimin e tij pas sinjaleve të marra në rrugë operative për veprimtari të mundshme të paligjshme. Mësohet se i arrestuari është 25- vjeçari Denis Muhametaj, banues në Llakatund, Vlorë. "Specialistët e Seksionit për Hetimin e Narkotikëve dhe Trafiqeve të Paligjshme në Drejtorinë Vendore të Policisë Vlorë, në vijim të punës për goditjen e paligjshmërisë si dhe në kuadër të një pune disajavore për kapjen e personave që kryejnë veprimtari kriminale dhe që posedojnë armë zjarri pa leje, kanë zhvilluar dhe finalizuar operacionin policor të koduar "Mercury", ku si rezultat është arrestuar në flagrancë shtetasi Denis Muhametaj, 25 vjeç, banues në Llakatund, Vlorë", bëri të ditur Policia nëpërmjet një njoftimi për shtyp. Sipas njoftimit të dhënë, në banesën e këtij shtetasi në fshatin Llakatund, janë sekuestruar në cilësinë e provës materiale një sërë mjetesh, armë e një sasi droge. Policia theksoi se u sekuestrua një armë zjarri automatike model 56, si dhe katër krehra pistolete dhe kallashnikovi. Gjithashtu, janë sekuestruar edhe 1260 copë fishekë pistolete dhe kallashnikovi. Blutë gjetën dhe sekuestruan edhe 3 motorë për mjete ujore me 300 kë fuqi, 3 automjete tip furgon, autoveturë dhe kamionçinë, 15.7 kg kanabis si dhe 340 kubikë me kanabis. "Materialet hetimore iu referuan Prokurorisë së Rrethit Gjyqësor Vlorë, për veprat penale "Kontrabanda me mallra të tjera", "Mbajtja pa leje dhe prodhimi i armëve, armëve shpërthyese dhe i municionit", "Prodhimi, shitja e narkotikëve", dhe "Kultivimi narkotikëve", parashikuar nga nenet 174, 278, 283/ 1 dhe 284 të i Kodit Penal. Sipas të dhënave, në momentin e arrestimit, i riu nuk ka bërë rezistencë. Policia bëri të ditur se aksioni kishte nisur në sajë të informacioneve të siguruara në rrugë operative për veprimtarinë e 25- vjeçarit. Ka dyshime të forta se i riu është i përfshirë në trafikun e drogës. Tashmë po hetohen bashkëpunëtorë të mundshëm të tij, si dhe shkakun e posedimit të armatimit e motorëve që shërbejnë për mjetet detare. për efekt hetimi, Policia nuk bëri të ditur të dhëna në lidhje me dëshminë e të riut.