Ruçi, letër Senatit italian: Jemi pranë familjeve të viktimave
Kryetari i Kuvendit, Gramoz Ruçi, i ka dërguar një letër ngushëllimi Senatit dhe Dhomës së Deputetëve të Italisë pas tragjedisë në Genova, ku humbën jetën dhjetëra njerëz. Kreu i Kuvendit shprehu dhimbjen e thellë për humbjen e jetëve dhe u uron shërim të shpejtë të mbijetuarve. Ai falënderon genovezët për mbështetjen ndaj shqiptarëve dhe thotë se populli shqiptar ndan dhimbjen me ta. “E nderuar znj. Presidente Casella, i nderuar z. President Fico. Në këto ditë dhimbjeje të madhe për popullin mik dhe fqinj të Italisë, shkaktuar nga katastrofa në Genova, në emër të Kuvendit të Shqipërisë dhe në emrin tim personal, shpreh dhimbjen e thellë për humbjen e jetëve njerëzore. Të gjithë jemi këto ditë në Genova, pranë familjeve që humbën të dashurit e tyre, pranë të lënduarve, të cilëve u urojmë shërim të shpejtë dhe pranë zjarrfikësve heronj që luftojnë për të shpëtuar jetë. Dhimbja juaj është edhe dhimbja jonë”, shkruan kreu i Kuvendit në letrën e tij të ngushëllimit. Në vijim të saj, Ruçi shpreh solidaritetin e popullit shqiptar ndaj atij italian në këtë tragjedi, duke kujtuar se te populli italian ka gjetur gjithmonë mikun dhe fqinjin e mirë. “Duke shprehur solidaritetin me popullin mik dhe fqinj italian, populli shqiptar nuk do të harrojë kurrë mbështetjen e familjeve dhe institucioneve italiane për shqiptarët dhe Shqipërinë. Bujaria e qytetarëve italianë dhe në veçanti e genovezeve, është në zemrat dhe mirënjohjen e çdo shqiptari”, thuhet në letrën e kreut të Kuvendit, Gramoz Ruçi.