Zbardhen përgjimet për deputetin e PS, PD: Pjesë e bandës së Shullazit, të arrestohet
REAGON DEPUTETI I PS, ÇYRBJA: DUAN TE ME DEMTOJNE IMAZHIN
Partia Demokratike i kërkon Prokurorisë së Përgjithshme të sjellë në Parlament kërkesën për arrestimin e deputetit socialist, Jurgis Çyrbja, duke e cilësuar atë si anëtar të bandës së Emiljano Shullazit.
Pas përgjimeve të publikuara në media, sipas të cilave ish- kreu i Hipotekës në Durrës kontaktonte me mikun e ngushtë të Emiljano Shullazit, nënkryetari i Grupit Parlamentar të PD- së, Enkelejd Alibeaj, ka akuzuar qeverinë dhe Kryeministrin Rama se ka futur në parlament shërbëtorët e krimit. “Jurgis Çyrbja, deputet i Edi Ramës në Shijak, është simbol se si Kryeministri i vendit vazhdon bashkëqeverisjen me krimin e organizuar. Përgjimet e bëra publike sot nga media provojnë qartë se deputeti i Edi Ramës, Jurgis Çyrbja, është anëtar i bandës së Emiljano Shullazit, por ndryshe nga ai, nuk është në burg, por anëtar i Parlamentit. Sipas përgjimeve të publikuara, deputeti Çyrbja ka komunikuar të paktën dy herë në telefon me Gilmando Danin, krahun e djathtë të Emiljano Shullazit, për çështjen e hotel “Vollgës”, e cila është regjistruar në pronësi të Emiljano Shullazit nga Jurgis Çyrbja. Në të dyja rastet, si shërbëtor besnik, deputeti Çyrbja, në atë kohë drejtor i Hipotekës Durrës, e informon Gilmando Danin për veprimet e Prokurorisë. Partia Demokratike kërkon nga Prokuroria zbatimin e ligjit, duke sjellë në Kuvend kërkesën për arrestimin e menjëhershëm të deputetit Jurgis Çyrbja, anëtar i bandës së Emiljano Shullazit”, tha Alibeaj.
TELEFONATAT Sipas nënkryetarit të Grupit Parlamentar të PD- së, deputeti socialist Çyrbja, duke qenë i lidhur me bandën e Shullazit, jo vetëm ka mbrojtur këtë të fundit në sallën e gjyqit, por ka dhënë edhe dëshmi të rreme duke mohuar të jetë takuar sërish me Gilmando Danin pas regjistrimit të pronës së hotel “Vollgës”. “Telefonata e parë u bë prej anëtarit të bandës në krye të Hipotekës, menjëherë pas sekuestrimit të dosjes së hotel “Vollgës” nga Prokuroria. “E kemi keq punën. Lidhet me detyrën time”, janë fjalët e deputetit Çyrbja në adresë të Gilmando Danit, i cili ka qenë në përgjim. Telefonata e dytë mes të dyve është kryer menjëherë sapo ish- kreu i Hipotekës ka dalë nga Prokuroria e Krimeve të Rënda dhe i ka kërkuar takim Gilmando Danit, krahut të djath- të të Emiljano Shullazit. Disa muaj më pas, Jurgis Çyrbja gjatë seancës gjyqësore jo vetëm që dëshmoi në favor të Emiljano Shullazit, por ai ka gënjyer drejtësinë, duke pohuar se të vetmin kontakt me Gilmando Danin e ka pasur gjatë kohës së regjistrimit të pronës”, theksoi deputeti i PD- së. Sipas demokratëve, Çyrbja që në kohën që është denoncuar prej tyre duhet të ishte prapa hekurave, por Kryeministri Rama e shpërbleu dhe e mori në mbrojtje, duke i dhënë mandate dhe duke e sjellë në Parlament. “PD- ja e ka denoncuar që në fillim ish- drejtorin e Hipotekës së Durrësit, Jurgis Çyrbja, si anëtar të bandës së Emiljano Shullazit, por, në vend që të ishte në burg bashkë me bosin e tij, Edi Rama e shpërbleu dhe e mori në mbrojtje bandën, duke e bërë Jurgis Çyrbjen deputet të Kuvendit të Shqipërisë”, theksoi nënkryetari i grupit të PD- së.