Policia i ndjek si në filma, dy të armatosur përplasin 7 makina
Motorët e Njësisë “Shigjeta” i ndoqën nga Bulevardi i Ri deri te kryqëzimi i Burgut 313, u arrestuan pasi hodhën pistoletat
Sirena Policie, përplasje të forta dhe zhurmë që vinte nga Bulevardi i Ri pranë ish- Stacionit të Trenit e deri te kryqëzimi i Burgut 313, më pas një përplasje e fortë në semafor.
Dy të rinj që hidhen nga makina e përplasur, pistoleta të hedhura rrugëve e më pas dhjetëra forca policie, që rrethojnë zonën e arrestojnë “të pabindurit”. Kjo ishte një panoramë aspak e zakontë pak para mesnatës së të enjtes, në Tiranë, që nxori nga rrugë dhjetëra kureshtarë, që u mblodhën për “të zbuluar” çfarë kishte ndodhur. Një skenë e denjë për filma aksion. E pasi përfunduan të gjitha veprimet policore, “keqbërësit” u kapën bashkë me armët. Ngjarja, që në pamje të parë të ngjante me një aksident të rëndë, rezultoi të ishte një aksion policor. Protagonistët, Gentjan Goçi, 25 vjeç, që drejtonte makinën dhe shoku i tij pasagjer, Ervin Kodra, 33 vjeç, u arrestuan nga efektivët e “Shigjetave”, që rrëzuan motorët dhe i ndoqën këmba këmbës derisa i neutralizuan. Në fakt, Salla Operative kishte informacion që automjeti tip “Tuareg” me targë AA 508 IZ, u ishte dhënë shërbimeve për t’u ndaluar, pasi kishte informacione se ndodheshin persona të armatosur. Por mjeti është konstatuar vetëm në mbrëmje. Bilanci i gjithë këtij aksioni, veç rezultatit final, ishte disi i rëndë sa u përket dëmeve që shkaktoi. Të paktën 7 makina pësuan dëme të shumta materiale, pasi u përplasën nga të rinjtë me “Tuareg”, që i iknin policisë. Makina e fundit, një “Passat” që priste t’i hapej semafori në kryqëzimin e Burgut 313, pësoi dëmet më të mëdha. Madje, në vendngjarje autoambulanca mori edhe dy të plagosur brenda kësaj makine. Por në Spitalin e Traumës nuk ndodhej më asnjë i plagosur, pasi pas mjekimit ishin larguar drejt shtëpive. OPERACIONI
Ndonëse ngjarja ndodhi rreth orës 23: 00 të mbrëmjes së të enjtes, Policia foli zyr- tarisht mesditën e djeshme. Sipas Policisë së Tiranës, aksioni kishte ndodhur në vijim të zbatimit të planit të masave për parandalimin, evidentimin dhe goditjen e elementëve me precedentë kriminalë në fushën e armëmbajtjes pa leje, të trafikut të lëndëve narkotike, atyre në fushën e vjedhjes, për drejtuesit e mjeteve që bëjnë gara shpejtësie apo xhirojnë gomat në ambiente publike, të atyre që drejtojnë mjetet në gjendje të dehur etj. Policia tha se në këtë kuadër, mbrëmjen e së enjtes, rreth orës 23: 20, Policia e Tiranës ka evidentuar dhe goditur një tjetër rast të armëmbajtjes pa leje dhe mosbindjes së punonjësve të Policisë për të ndalu- ar, ku falë punës së mirëorganizuar dhe ndjekjes nga ana e shërbimeve të Policisë, kapen dhe arrestohen drejtuesi i mjetit dhe pasagjeri. “Gjatë ndjekjes nga Policia të automjetit ku udhëtonin dy shtetasit që mbanin armë zjarri me vete, drejtuesi i automjetit ka përplasur, duke u shkaktuar dëme materiale, 4 automjeteve të tjera. Policia gjeti dhe sekuestroi dy armë zjarri, pistoleta, të cilat u hodhën në një oborr banese dhe në një rrugicë nga drejtuesi i mjetit dhe pasagjeri. Nga specialistët për Hetimin e Krimeve të Komisariatit të Policisë Nr. 3, në bashkëpunim me specialistët për Hetimin e Krimeve ndaj Jetës dhe Pronës u bë arrestimi në flagrancë i shteta- sve Gentjan Koçi, 25 vjeç, dhe Ervin Kodra, 33 vjeç”, tha zyrtarisht Policia. Më tej sqaroi se këta shtetas, në rrugën “Jordan Misja”, duke lëvizur me mjetin tip “Tuareg”, i cili drejtohej nga shtetasi Gentjan Koçi dhe pasagjer shtetasi Ervin Kodra, nuk i janë bindur shenjës së ndalimit të shërbimit të “Forcës së Posaçme Shigjeta”, pasi mbanin 2 armë zjarri pa leje, por janë larguar me shpejtësi. Në këtë formë, ata janë bërë burim aksidenti e duke u përplasur edhe me 4 mjete të tjera ( sipas Policisë) në rrugë, duke iu shkaktuar dëme materiale. Pas ndjekjes nga ana e shërbimeve të Policisë, këta shtetas janë ndaluar në rrugicat e rrugës “Jordan Misja”, ku dhe u bë arrestimi në flagrancë i tyre.