Pas tragjedisë në Itali, nis inspektimi i urave
Monitorim të rreptë tejkalimit të peshës së ngarkesave në mjete
Pas tragjedisë së Genova- s, ku humbën jetën 39 persona, edhe autoritetet shqiptare kanë nisur inspektimin e urave në vendin tonë, për të verifikuar parametrat e sigurisë.
Drejtori i Përgjithshëm i Policisë Rrugore, Mithat Tola, dje gjatë një daljeje publike tha se në bashkëpunim me Autoritetin Rrugor Shqiptar, ka filluar inspektimi i sistemeve të sinjalizimit mbi treguesit e peshës së lejuar të mjeteve mbi ura. Gjithashtu, Tola deklaroi se, shërbimet e Policisë Rrugore do të monitorojnë në mënyrë të rrepë tejkalimin e peshës së ngarkesave të mjeteve. “Javën në mbyllje dhe javët në vijim, shërbimi i Policisë Rrugore në bashkëpunim me Autoritetin Rrugor Shqiptar, nisur nga ngjarja tragjike, rrëzimi i urës në Genova të Italisë, ku humbën jetën 39 persona, ka filluar inspektimin e sistemeve të sinjalizimit vertikal dhe horizontal mbi tregimin e peshës së lejuar të mjeteve mbi ura si dhe në përbërje të grupeve teknike të inspektimit edhe për të verifikuar gjendjen e këtyre strukturave dhe të elementeve të sigurisë. Në bashkëpunim me aktorë të tjerë të ngarkuar me ligj për menaxhimin e elementëve të sigurisë rrugore në këto infrastruktu- ra, shërbimi i Policisë Rrugore do të monitorojë në mënyrë të rreptë tejkalimet e peshave të ngarkesave të mjeteve, për të shmangur dëmtimet dhe respektimin e ligjit, duke prodhuar më shumë siguri rrugore”, u shpreh dje Tola. MASAT PER SEZONIN
Pas një analize paraprake dhe këshilla për drejtimin e mjeteve në sezonin e verës dhe parandalimin e aksidenteve, drejtori i Policisë Rrugore, Mithat Tola, bëri publike disa nga rezultatet e zbatimit të masave, por edhe akset problematike sa i takon trafikut. Sipas tij, Drejtoria e Policisë Rrugore ka evidentu- ar veçanërisht për ditën e mërkurë dhe të enjte, se në disa segmente rrugore u konstatuan bllokime dhe ngadalësime të ndjeshme të trafikut dhe qarkullimit të mjeteve. Ai tha se bllokime dhe ngadalësime të tilla janë konstatuar në qytetin e Sarandës dhe në hyrje të qytetit të Vlorës. Gjithashtu, edhe në të dy senset e rrugës Fushë- Krujë – Lezhë. “Sipas të dhënave të shërbimit të Policisë Kufitare dhe Emigracionit, në 15 ditët e para të muajit gusht 2018, në pikat e kalimit kufitar në territorin e Shqipërisë janë futur rreth 100 mijë mjete, duke u shtuar dukshëm mbi numrin e mjeteve vendëse dhe të mjeteve të turistëve ekzistues. Shërbimi i Policisë Rrugore në akset rrugore të mbingarkuara, ka vazhduar rregullimin dhe drejtimin e trafikut me orare të zgjatura, për ata drejtues mjetesh që me veprimet e tyre në shkelje flagrante të normave të sjelljes, ka marrë masat administrative në zbatim të nenit 141, ‘ Pozicioni i mjetit në karrexhatë’, i cili përveç masës administrative me gjobë, parashikon dhe pezullim të lejes së drejtimit për një periudhë kohe 2- 4 muaj”, tha Tola. Ai deklaroi se vetëm për tri ditët e fundjavës, shërbimi i Policisë Rrugore ka ndëshkuar për këtë shkelje rreth 91 drejtues mjetesh.