Reagon Çyrbja: Çështja u hetua nga Prokuroria

“Lajme vere, duan të dëmtojnë imazhin tim dhe të grupit të PS”

Deputeti socialist, Jurgis Çyrbja, reagoi dje pas akuzave të opozitës si anëtar i bandës së Shullazit. Përmes një statusi në “Facebook”, deputeti i Qarkut të Durrësit shprehet se çdo gjë ka ditur për grupin Shullazi e ka sqaruar para Prokurorisë një vit më parë. “Korrekt para ligjit dhe para zgjedhësve. Jam i detyruar të jap një shpjegim publik si detyrim ndaj zgjedhësve të mi mbi atë çfarë në media është transmetuar dhe më pas është keqpërdorur si gjithmonë, nga opozita pa ekip dhe pa lidership. Gjithçka pretendohet sot, e kam sqaruar në Prokurori dhe në dëshminë time përpara organeve të drejtësisë më shumë se një vit më parë”, shkruan në llogarinë e tij në “Facebook”. Sipas tij, lajmet e dala në media sponsorizohen nga opozita dhe kanë si qëllim dëmtimin e imazhit të tij dhe të forcës politike që përfaqëson. “Dua të informoj publikun se kjo është një çështje e hetuar nga Prokuroria, ku unë kam dhënë të gjithë informacionet dhe dëshmitë. Ata që sponsorizojnë lajme vere, nuk do të arrijnë qëllimin për të dëmtuar imazhin tim dhe të grupit parlamentar ku kam nderin të bëj pjesë, sikundërse nuk e arritën edhe para një viti me po të njëjtin lajm vere”, përfundon reagimin e tij deputeti socialist. Jurgis Çyrbja ka qenë drejtor i Zyrës së Regjistrimit të Pasurive të Paluajtshme në Durrës, ndërsa mori mandatin e deputetit në vitin 2015, kur depu- teti Blendi Klosi la mandatin pasi u emërua në krye Ministrisë së Mirëqenies Sociale, Rinisë dhe Sportit. Klosi zëvendësoi në këtë detyrë Erion Veliajn, i cili u zgjodh kryetar i Bashkisë së Tiranës.