Investim në Selitë, Veliaj: Regjistroni vendbanimin
Mbajmë premtimin për investime në çdo bllok banimi
Dora e Bashkisë së Tiranës ka arritur edhe në Selitë. Një bllok banimi, pa kurrfarë infrastrukture, sot ka rrugë të shtruara, ndriçim e trotuare. Bëhet fjalë për zonën e kufizuar nga rrugët "Hamdi Pepa", "Ilia Dilo Sheperi", "Visarion Xhuvani", "Leka i Madh", ku jetojnë mijëra banorë të ardhur kryesisht pas viteve ' 90. Pas investimit të bashkisë, tashmë radhën e kanë qytetarët, të cilët duhet të bëjnë deklarimin e vendbanimit. Ky ishte apeli i kryetarit Erion Veliaj, dje pasi inspektoi punimet. "Ftoj banorët të vijojnë me regjistrimin në zonë. Sot janë të gjithë qytetarë të Tiranës dhe duhet të regjistrohen këtu. Fakti që marrim taksa nga pjesa e vjetër e Njësisë 5 për t'i sjellë në zona ku vetëm së fundi, pas legalizimit, ka filluar të paguhet pak taksë prone, do të thotë se automatikisht Bashkia e Tiranës i ka privilegjuar. Tani ka ardhur koha që edhe ata të sillen si qytetarë të Tiranës dhe të bëhen pjesë e kësaj bashkësie që paguan diçka modeste, por në fund fare kontribuon në të mirën e përbashkët". Për ministrin Pandeli Majko, deputetin e zonës, i cili e ka shkelur këtë hapësirë shumë kohë më parë, kjo është një ndër pjesët më të bukura të Tiranës.
"Këtu kemi gjetur një fshat monopat dhe e kemi kthyer në një qytet të një standardi më të lartë. Këtu nuk është bërë thjesht shtrimi i rrugës apo rregullimi anësor i saj, por janë bërë edhe muret rrethuese dhe i kanë dhënë një pamje standardizuese gjithë rrugës, duke e kthyer atë ndoshta në pjesët më të bukura të Tiranës". Nga Njësia 5, kryebashkiaku Veliaj dha lajmin e mirë të ndërtimit të tri shkollave të reja, që do të ndërtohen nga projekti në bashkëpunim me privatin. "Disa nga vendimet më të rëndësishme për zonën do të jetë fillimi i shkollave të reja. Shkolla e parë që do të fillojë do të jetë afër Parkut Olimpik dhe besoj se edhe një nga problematikat e fundit që kemi, për sa i përket bashkisë në këtë zonë, shfryrja e klasave me dy turne, do të vijojë me shkollat e reja. Në total, do të jenë 17 shkolla të reja dhe vetëm për Njësinë 5, kemi 3 të tilla", nënvizoi kryetari, duke apeluar që banorët të mirëmbajnë investimet e bëra nga bashkia, pasi realisht janë pronë e tyre.