Nga kalaja e Shkodrës, tek afresket e Skëndulajve, fillojnë restaurimet
Kalaja e Shkodrës, ndërtesa karakteristike në Korçë e Gjirokastër apo objekte të kultit, do t’i nënshtrohen restaurimit. Së fundmi, Këshilli Kombëtar i Restaurimeve ka miratuar një sërë projektesh, që lidhen me objekte të rëndësishme të trashëgimisë kulturore. Ato shtrihen nga Veriu në Jug dhe përfshijnë monumente të disa tipologjive, si kala, kisha e ndërtesa private. Një ndër projektet e miratuara është “Ndërhyrje restauruese në Kalanë e Shkodrës”. Projekti i hartuar nga Drejtoria Rajonale e Kulturës Kombëtare Shkodër parashikon ndërhyrje konservuese dhe restauruese në muret e kalasë.
Po ashtu, Instituti i Monumenteve të Kulturës ka hartuar projektin për restaurimin e pikturës murale “Skena e Gjuetisë” në shtëpinë Skënduli, banesë 300- vjeçare, ndër më të spikaturat në Gjirokastër. Projekti i miratuar në KKR parashikon ndërhyrje konservuese dhe restauruese në pikturën murale, që ndodhet në fasadën e kësaj shtëpie- monument kulture, të kategorisë I, në lagjen “Palorto”.
Një tjetër projekt i miratuar nga KKR- ja është edhe ai për “Restaurimin e Kishës së Shën Sotirit”, në Kërçisht të Dibrës. Projekti i hartuar nga Drejtoria Rajonale e Kulturës Kombëtare Shkodër parashikon restaurimin e elementeve konstruktive të monumentit. E ndërtuar që në vitin 1270, kjo kishë është shpallur monument kulture në vitin 1970. Muret e saj janë të ndërtuara me gurë të lidhur me llaç gëlqereje. Në këto mure ruhen afreske të rralla, por që me kalimin e viteve kanë pësuar dëmtime.
Këshilli Kombëtar i Restaurimeve ka miratuar edhe projektin për “Restaurimin e Banesës së Filip Çekanit” në Korçë. Sipas IMK- së, projekti i hartuar nga Drejtoria Rajonale e Kulturës Kombëtare Korçë parashikon restaurimin e elementeve konstruktive të objektit. Banesa e Filip Çekanit është një monument i trashëgimisë kulturore, i llojit “Arkitekturë”, i miratuar në vitin 1979.