Raporti i CIA për Shqipërinë, Basha: Në 7 muaj u kapën 30 tonë kanabis
Reagon Ministria e Brendshme: Tekst i njëjtë përgjatë 2007- 2016
Për Agjencinë e Inteligjencës Amerikane, Shqipëria është një vend burimi kryesor për kanabisin.
Në raportin e saj vjetor faktmbledhës, të publikuar më 14 gusht, thuhet se Shqipëria vijon të jetë një burim kryesor për prodhimin e kanabisit si dhe një pikë aktive për tranzitin e drogave nga Azia Jugperëndimore. Raporti citon se Shqipëria mbetet “pikë aktive për tranzitin e drogave nga Azia Jugperëndimore”. Gjithashtu, për Shqipërinë, CIA vlerëson se është një rrugë ballkanike për tranzitin e hashashit dhe kanabisit dhe pjesërisht kokainës nga Amerika e Jugut, e destinuar për Europën Perëndimore. Duket se edhe pse është bërë një aksion i madh me mbështetjen edhe të shërbimeve partnere, për CIA- n nuk ka asnjë efekt kur thotë se, “Shqipëria është një burim kryesor për prodhimin e kanabisit”. Shërbimi Inteligjent Amerikan vlerëson se në Europë veprojnë organizata aktive shqiptare të narkotrafikut. “Shqipëria është vend vulnerabël për pastrimin e parave, që lidhet me trafikimin rajonal të narkotikëve, armëve, kontrabandës dhe qenieve njerëzore”, thuhet në prezantimin e Shqipërisë në faqen e CIA- s.
REAGIMI Ministria e Brendshme, përmes një njoftimi për mediat, sqaroi se lajmi i dalë në media referuar raportit të CIA- s është i pasaktë dhe keqorientues. “Ministria e Brendshme sqaron se lajmi i dalë në media në lidhje me publikimin e një raporti të ri të CIA- s mbi situatën e sigurisë në Shqipëri, është i pasaktë dhe keqorientues për publikun”, thuhet në reagimin e Ministrisë së Brendshme. Sipas ministrisë, të dhënat e faqes së CIA- s i përkasin datës 14 gusht, por informacioni që jepet aty është shumë i përgjithshëm dhe aspak specifik. “Sqarojmë se nuk ka ndonjë raport specifik të kësaj organizate të publikuar në ditët e fundit në lidhje me situatën në Shqipëri. ‘ The World Factbook’, është i publikuar në faqen zyrtare të CIA- s. Ky është një produkt i kësaj organizate, që përditësohet në mënyrë të përjavshme dhe përmbajtja është lehtësisht e aksesueshme online. Pra, megjithëse përditësimi i fundit është i datës 14 gusht 2018, theksojmë se ky është një përditësim i ‘ Factbook’ si i tërë dhe jo i të dhënave specifike për Shqipërinë”, vijon Ministria e Brendshme sqarimin e saj. Duke e cilësuar pa të dhëna të freskuara për atë që po ndodh realisht në Shqipëri, në sqarimin e saj, ministria shprehet se teksti për Shqipërinë është i njëjtë me atë të publikuar në 9 vitet e fundit. “Aktualisht, për Shqipërinë, ‘ Factbook’ ka të njëjtën përmbajtje me atë të vitit 2017 dhe ky tekst, me ndryshime të vogla, është pothuajse i njëjtë me atë të publikuar gjatë periudhës 2007- 2016. Bashkëlidhur me këtë njoftim përcjellim edhe fotot ‘ print- screen’ të faqeve përkatëse të ‘ Factbook’ sipas viteve”, thuhet në njoftimin e ministrisë. Nuk mungojnë në sqarimin e Ministrisë së Brendshme dhe akuzat politike ndaj këtij lajmi të bërë në media referuar faqes faktmbledhëse të CIA- s amerikane. “Spekulimet politike për të prodhuar me çdo kusht lajme negative njollosin dhe cenojnë drejtpërdrejt punën dhe sakrificat e punonjësve të Policisë së Shtetit”, sqaron ministria e Brendshme. Sipas saj, mediat kanë pasur dhe do të kenë nga kjo ministri çdo informacion në lidhje me të dhënat e kriminalitetit në Shqipëri. “Ministria e Brendshme ka qenë dhe mbetet e hapur dhe transparente me median duke informuar me korrektesë për ngjarje që kanë të bëjnë me luftën kundër paligjshmërisë e kriminalitetit”, përfundon sqarimin e saj Ministria e Brendshme.