Policia: Edmond Bego e ka shlyer dënimin, bëri 1 vit e 11 muaj burg
“Nuk është në kërkim kombëtar e ndërkombëtar nga autoritetet policore shqiptare për llogari të ndonjë shteti tjetër”
Policia e Shtetit reagoi dje në lidhje me arrestimin nga autoritet greke të biznesmenit shqiptar Edmond Bego, duke deklaruar se ky shtetas nuk është në kërkim kombëtar e as ndërkombëtar për llogari të ndonjë shteti tjetër.
Ndërsa shton se, nga verifikimet e kryera në sistemin TIMS, ndërtuesi 48- vjeçar rezulton të ketë kaluar disa herë kufirin shqiptar, madje edhe në drejtim të Italisë, që nga viti 2013 deri në vitin 2018. Udhëtimi i fundit drejt Italisë është ai i datës 13 korrik të këtij viti. Sipas Policisë, Edmond Bego e ka shlyer dënimin e dhënë nga Italia, që ishte njohur nga drejtësia shqiptare dhe ka qëndruar në burg 1 vit e 11 muaj. Pjesën tjetër të dënimit të dhënë nga Gjykata e Lartë e ka shlyer me kusht, sipas një vendimi të Gjykatës së Krujës. “Për dy ditë me radhë ka një debat publik, lidhur me ndalimin e shtetasit Edmond Bego në Greqi. Pas verifikimeve të kryera, Policia e Shtetit sqaron se në dosjen e Kërkimit dhe Arkivës së Interpolit, shtetasi shqiptar Edmond Bego, alias Manoli Bego, Sajmir Sina, Belul Gjatari apo Mond Bega, 48 vjeç, nuk është në kërkim kombëtar dhe ndërkombëtar nga autoritetet policore shqiptare për llogari të ndonjë shteti tjetër”, tha dje zyrtarisht Policia e Shtetit. REAGIMI I POLICISE Policia sqaroi dje se më herët, shtetasi Edmond Bego është arrestuar më datë 24 dhjetor 2009 në Tiranë për llogari të drejtësisë në Itali, me urdhër arresti ndërkombëtar të lëshuar në vitin 2009, nga Gjykata e Apelit të Torinos. Nga Prokuroria e Përgjithshme, më datë 11 shkurt 2010 në Policinë e Shtetit ka ardhur kërkesa për njohje e vendimit penal italian nr. 1735, datë 22 prill 2008, i formës së prerë të vitit 2009 dhënë nga Gjykata e Apelit Torino, Itali. Me vendimin nr. 807, datë 15 shtator 2010, Gjykata e Lartë në Shqipëri ka bërë njohjen e vendimit penal të huaj dhe ka dënu- ar përfundimisht me 4.4 vite burg këtë shtetas. Ai është liruar nga burgu në 24 nëntor 2011, pasi ka vuajtur rreth 1 vit e 11 muaj burgim, me vendim të Gjykatës së Rrethit Gjyqësor Krujë, e cila mbi bazën e kërkesës së të dënuarit ia konvertoi pjesën e mbetur prej 1.8 vitesh burgim, në liri me kusht. Pas këtij vendimi, Policia e Shtetit nuk ka asnjë mundësi tjetër veprimi.
UDHETIMET “Nga verifikimet e kryera në sistemin TIMS, shtetasi në fjalë ka dalje dhe hyrje nga territori shqiptar nga vitet 2013 deri në vitin 2018, edhe drejt Italisë. Ai në territorin italian ka hyrë 3 herë në vitin 2017 dhe më datë 13 korrik në vitin 2018. Bego, më datë 8 gusht 2018 ka dalë nga pika e kalimit kufitar Qafë Botë drejt ter- ritorit grek, siç ka bërë edhe më herët në vitet 2014, 2015, 2016, 2017 dhe 2018, në disa raste në mënyrë të përsëritur”, deklaroi dje zyrtarisht Policia e Shtetit. Sipas deklaratës, për këtë shtetas nuk ka pasur asnjë urdhër tjetër ndalimi ndërkombëtar përveç urdhrit të ndalimit të ekzekutuar nga Policia e Shtetit në vitin 2009, që do të vinte në lëvizje Interpol Tiranën dhe Policinë e Shtetit, apo ndonjë kërkesë nga autoritetet italiane dhe misionet e tyre policore në Tiranë, ndryshe nga sa u deklarua nga subjekti politik Partia Demokratike. “Policia e Shtetit apelon çdokënd t’i drejtohet asaj për informacion të saktë dhe zyrtar, duke shmangur keqpërdorimet për interesa politike të ditës”, mbyll reagimin Policia.