“Opozita të ndryshojë qëndrim për Magjistraturën”
Balla: Tre shtatori, testi i parë i gatishmërisë së opozitës
Kryetari i Grupit të Partisë Socialiste, Taulant Balla, i ka bërë thirrje dje sërish opozitës, që të votojë në sesionin e ri parlamentar, projektligjin për “Statusin e gjyqtarëve dhe prokurorive”. Kjo nismë, sipas Ballës, do t’u japë mundësi studenteve ekselentë që të ndjekin Shkollën e Magjistraturës dhe të jenë pjesë e sistemit të drejtësisë. “Kuvendi i Shqipërisë rifillon punimet në 3 shtator dhe unë do të doja që të ribëja edhe një herë apelin përkundrejt opozitës që në seancën e parë, atë të 3 shtatorit, që të kishin mundësinë të votonim menjëherë rivendosjen në afat të një dispozite tranzitore, që ka të bëjë me Shkollën e Magjistraturës. Shkolla e Magjistraturës është pjesë e një projekti të rëndësishëm bashkëpunimi mes dy vendeve tona, Shqipërisë dhe Gjermanisë”, ka thënë Balla. Sipas tij, opozita duhet të ndryshojë qëndrim këtë sesion të ri parlamentar dhe të mos krijojë vonesa në sistemin e drejtësisë. “Ne duam që në këtë rrugë të mos jemi vetëm, por të kemi bashkë edhe opozitën. Testi i parë i gatishmërisë së opozitës për të qenë pjesë e këtij procesi është pikërisht vota e tyre në favor të fillimit të vitit shkollor për Shkollën e Magjistraturës, edhe pse ndoshta pak me vonesë, që asistenca e vyer gjermane dhe ajo e Bashkimit Europian përkundrejt Shkollës së Magjistraturës të jetë funksionale, sepse do të jetë Shkolla e Magjistraturës që do të mbushë vendet vakante të krijuara në sistemin e drejtësisë për shkak të largimit nga sistemi të gjyqtarëve apo prokurorëve, të cilët nuk kanë kaluar vetingun. Opozita duhet të kuptojë që sjellja e deritanishme dhe roli i saj duhet të jetë tërësisht i ndryshëm nga ai që ka qenë në dy sesionet e shkuara kuvendore”, ka deklaruar dje Balla.