Daçiç në krah të Lavrov: Duan Shqipërinë e Madhe
"Shqiptarët synojnë territor deri në Nish e Veri të Greqisë"
Ministri i Jashtëm i Serbisë, Ivica Daçiç, u takua të martën në Soçi të Rusisë me kryediplomatin rus, Sergei Lavrov, duke pasur në fokus Kosovën.
Takimi mbahet para bisedimeve intensive që do të mbahen mes dy ekipeve negociatore të nivelit të lartë të Kosovës dhe Serbinë në Bruksel, duke nisur që nga shtatori, me një parashikim për arritjen e një marrëveshjeje në fillim të nëntorit. Daçiç dhe Lavrov janë përpjekur të krijojnë panoramën e një trajtimi të padrejtë të serbëve në Kosovë, duke u bërë shpesh thirrje gjatë konferencës së tyre, qoftë KFORit, EULEX- it apo BE- së që mbrojnë serbët, që të ndalojnë shqiptarët nga dhuna ndaj serbëve dhe të mos lejojnë shqiptarët të bëjnë trazira në Ballkan për territore, a thua se luftërat në Ballkan kanë nisur nga shqiptarët. Lavrov i ka paraqitur serbët në Kosovë si të rrezikuar. Sipas tij, KFOR- i dhe EULEX- i duhet të parandalojnë plotësisht çdo përpjekje për dhunën dhe vandalizmin në Kosovë drejtuar kundër serbëve dhe vendeve fetare. Por realiteti në terren është se serbët jo vetëm që nuk janë të rrezikuar në Kosovë, por askush nuk i pengon të lëvizin të lirë. "Ne ndajmë qëndrimin me Serbinë, se ekziston nevoja për të shmangur çdo veprim që mund të çojë në ndonjë linjë ndarjeje në Ballkan, që mund të mbështesë parimin ose me ne, ose kundër nesh", tha Lavrov pas takimit në Soçi me ministrin e Jashtëm të Serbisë, Ivica Daçiç. Ai shtoi se është absolutisht i sigurt se një e ardhme e qëndrueshme dhe e sigurt mund të sigurohet vetëm në kuadrin e bashkëpunimit të barabartë e të ndërsjellë, që përkrah Rusia dhe Serbia. Lavrov akuzoi Kosovën se ka dështuar që të zba- tojë marrëveshjet e arritura në Bruksel me Serbinë. Ai i ka kërkuar Bashkimit Europian që të bëjë presion te shqiptarët e Kosovës që këto marrëveshje të funksionalizohen. "E shohim qëndrimin konstruktiv të Beogradit në bisedimet me Prishtinën të ndërmjetësuar nga BE- ja, por nuk mund të themi të njëjtën për qëndrimin e shqiptarëve të Kosovës, pasi ata s'po zbatojnë marrëveshjet e arritura shumë vite më parë", ka thënë Lavrov. Derisa ka folur për çështjen Kosovë- Serbi, Lavrov ka theksuar se marrëdhëniet Rusi- Serbi janë për t'u vlerësuar.
Ndërsa Daçiç, duke marrë shkas nga deklarata e Presidentit të Kosovës, Hashim Thaçi, për të përfshirë në hartën e Kosovës edhe Luginën e Preshevës, ka akuzuar shqiptarët se synojnë marrje territoresh nga fqinjët. "Sh- qiptarët nuk e kuptojnë se situata dhe bota ka ndryshuar", tha në Soçi zëvendëskryeministri i parë dhe ministri i Jashtëm serb, Daçiç. Sipas tij, kërkesat e shqiptarëve janë dëshmi e mungesës së gatishmërisë për kompromis. "Të gjithë duan projektin e Shqipërisë së Madhe dhe për ata e gjithë kjo është pak, duan të vijnë në Nish. Ata do të merrnin gjysmën e Malit të Zi, gjysmën e Maqedonisë deri në Veri të Greqisë", aludoi Daçiç.