Aksioni me dron, 4 të arrestuar, qindra gjoba
Mbi 100 shoferë gjobiten për parakalim të gabuar, 11 të dehur
Katër persona janë arrestuar në kushtet e flagrancës gjatë një aksioni të Policisë Rrugore në qytetin e Durrësit.
Për të katër rastet bëhet fjalë për drejtim automjeti në gjendje të dehur, ndërsa 37 personave të tjerë u është pezulluar leja e drejtimit për shkelje të rregullave të qarkullimit. Aksioni është kryer gjatë fundjavës nga specialistët e Qarkullimit Rrugor në bashkëpunim me specialistët e Rendit, që kanë ushtruar kontrolle të përbashkëta gjatë fundjavës. Gjatë aksionit, Sektori i Rendit u ka ushtruar kontroll mjeteve mbi e evidentimin e rasteve të posedimit të sendeve të paligjshme, me qëllim rritjen e sigurisë së qytetarëve. Si rezultat i kontrolleve të ushtruara, vetëm në fundjavë janë proceduar penalisht 6 shtetas për drejtim të motoçikletave pa leje drejtimi dhe janë arrestuar në flagrancë 4 shtetas për drejtim mjeti nën ndikimin e alkoolit. Ndërsa gjatë aksionit, 147 shoferë janë konstatuar duke drejtuar automjetin ndërsa përdornin telefonin dhe për këtë arsye janë gjobitur. Një numër prej 114 shoferësh janë gjobitur për parakalim të gabuar, që në shumë raste është rreziku kryesor për aksidente të rënda. Gjithashtu, gjatë këtij aksioni 45 shoferë të tjerë janë gjobitur për shkak të mosvendosjes së rrip- it të sigurimit gjatë udhëtimit. Specialistët e Qarkullimit Rrugor Durrës këshillojnë çdo drejtues mjeti të mos përdorin alkool, mos drejtojnë mjetet pa qenë të pajisur me leje drejtimi dhe të respektojnë me rigorozitet rregullat e qarkullimit rrugor, në të kundërt do të ndëshkohen me masë administrative apo sipas legjislacionit penal. Kontrolle të kësaj natyre, duke planifikuar shërbime shtesë në çdo aks rrugor, në Qarkun e Durrësit do të zbatohen edhe në ditët në vijim për parandalimin e aksidenteve, që gjatë këtij sezoni veror kanë shkaktuar me dhjetëra viktima në të gjithë vendin. Gjatë aksioneve të fundit, Policia Rrugore ka futur në përdorim dhe dronin si mjet për konstatimin e shkeljes së rregullave të qarkullimit rrugor.