Lezha e rrezikuar nga virusi i Nilit, shkak ndotja e Drinit
LEZHE - Në vendin tonë, deri tani nuk është shënuar asnjë rast me virusin e Etheve të Nilit Perëndimor, por kjo nuk e përjashton Shqipërinë nga rreziku. Specialistët e Shëndetësisë apelojnë që të tregohet kujdes me higjienën dhe thonë se ndotja mund të jetë rrezik potencial, pasi ky virus mund të përhapet nga mushkonjat. Nisur nga kjo, ekspertët e Mjedisit në Lezhë ngrenë alarmin për ndotjen e lumit Drin, i cili ka potencial për rrezikun e virusit të Nilit. Eksperti i Mjedisit, Jak Gjini, kërkon marrjen e masave urgjente, pasi ndotja e lumit është në përmasa alarmante kryesisht në periudhën e verës. “Prezenca e lumit të ndodhur në një zonë kaq urbane, bëhet potencial rreziku për virusin e Nilit për arsye se janë mushkonjat ato që e përhapin këtë virus”, shprehet Gjini. “Një nga treguesit e ndotjes është kur uji nuk lëviz. Prezenca e lumit në një zonë kaq urbane përbën rrezik për virusin e Nilit për shkak të mushkonjave. Ndotja e këtij lumi në pjesën që përshkon qytetin është mjaft e madhe. Nuk ka vend për panik, por duhet të merren masa urgjente për t’i dhënë zgjidhje kësaj problematike. Duhet kthimi i prurjeve nga hidrocentrali i Ashtës në lumin Drin që përshkon Lezhën, me qëllim që uji të qarkullojë, çka do ta eliminonte sadopak ndotjen”. Hedhja e mbetjeve të ndryshme shtëpiake deri te kafshët e ngordhura, por edhe derdhja e ujërave të zeza, janë një kambanë alarmi për rrezikun që iu kanoset qytetareve të Lezhës nga lumi Drin, situatë e cila mund të sjellë ndonjë epidemi apo edhe përhapjen e virusit të Nilit. Megjithatë, eksperti i Mjedisit thotë se nuk ka vend për panik, por duhen marrë masa parandaluese. “Lezha ka rrjedh 10 hektarë habitate ku riprodhohen mushkonjat, pa llogaritur sipërfaqen e lumenjve. Deri sa janë prezente këto habitatet, duhen marrë masa”, u shpreh ai. Ky virus ka shkaktuar me dhjetëra të vdekur në rajonin e Ballkanit, ndërsa numri më i lartë i tyre është regjistruar në Serbi dhe Greqi. Te të prekurit, virusi mund të shkaktojë sëmundje neurologjike deri edhe vdekjeprurëse. Në të gjithë botën, ende nuk janë në dispozicion vaksinat për të parandaluar infektimin nga virusi i Nilit Perëndimor te njerëzit. e. h