Pse aktorët e duan “KoKo Fest”
Ndriçim Xhepa: Vlerësim maksimal, pjesë e çdo edicioni “Si një pjesëmarrës në të gjitha edicionet e ‘ KoKo Fest’, i cili zhvillohet në një qytet, që e do teatrin dhe artistët do ta vlerësoja maksimalisht këtë festival. Në këtë edicion të pestë do t’u uroja sukses të gjithë interpretuesve që do të luajnë tashmë në një skenë të re, ku do të ndjejnë një kënaqësi akoma dhe më të madhe”. Yllka Mujo: Mbledh ëndrrat tona dhe i kthen në shfaqje “Një festë që të ngazëllen. Është festival, ku artistët ushqehen me art dhe dashuri. Ky festival i komedisë mbledh ëndrrat tona dhe i kthen në buqetë shfaqjesh. Të gjithë duhemi më shumë!” Viktor Zhusti: I ëmbël si “Koko- t” e gjysheve Fjalën “KOKO” e dëgjoja shpesh nga e mira gjyshe, sa herë më kish ruajtur ndonjë copë ëmbëlsirë. Kështu që, kur dëgjova se më ftonin në “KOKO FEST” (!!!) ndjeva të buzëqesh gjithë ngrohtësi e nostalgji. Mes shumë traditave, arti, teatri më saktë, i solli një tjetër traditë të re qytetit të lashtë. Çdo fillim vjeshte, Korça bujare pret krahë e zemër hapur: artistë, miq e të ftuar, nga të dy anët e kufirit, e shpesh edhe më përtej. Shpërndan “KOKO” për vetëm një javë, por shija, përshtypjet dhe emocionet që përfton, s’të ndahen deri në vjeshtën e ardhshme, kur mezi pret për t’i shijuar përsëri! Falënderoj teatrin “A. Z. Çajupi”, veçanërisht “korçarkën” e palodhur Zamirën, që më bëri pjesë të atij festivali! Falënderoj gjithë përzemërsi publikun korçar për qytetarinë, kulturën dhe entuziazmin, me të cilat rrethon miqtë e saj! Sukses e jetëgjatësi “KOKO FEST- it”! Eva Alikaj: E befasuar nga organizimi dhe mikpritja “KoKo ishte për mua një festival shumë i veçantë, jo vetëm për faktin që ishte festivali i parë, ku unë ulesha në karrigen e jurisë, por njëkohësisht u befasova nga mikpritja e korçarëve dhe kujdesi i veçantë i drejtores së këtij festivali, Zamira Kita. Arrita të njoh dhe të kënaqem me shumë artistë të trevave shqiptare, shumë të talentuar, të cilët s’i kisha njohur më parë. Ndihem shumë e nderuar!” Rajmonda Bulku: Nivel i lartë artistik “’ KoKo FEST’ është një event artistik i menaxhuar shumë mirë dhe me nivel të lartë artistik, si në zgjedhjen e jurisë tepër profesionale, ashtu dhe në zgjedhjen e shfaqjeve konkurrente në festival. Do lija edhe pushimet për të shkuar në ‘ KoKo FEST’. Suksese Teatrit të Korçës! Suksese Zamira Kita!” Dhimitër Orgocka: Festival që u flet të gjithëve “Me mendimin që e sotmja po paraqitet si një kohë që po ndryshon. Me mendimin se arti u flet të gjithëve, madje edhe ‘ të veçantëve’ u drejtohet me melodinë komike dhe ndodh që edhe ‘ ata’ ia marrin me iso nga pas. Me mendimin se Korça dhe teatri ju mirëpret me dashuri e mirënjohje, edhe unë mirëpres kolegët me gjithë zemër në suksesin e përbashkët ‘ KoKo FEST’!” Olta Daku: Do lë gjithçka, të shkoj në “KoKo Fest” “Do të lë çdo gjë dhe do të shkoj në ‘ KoKo FEST’! Nuk duhet humbur asnjë shfaqje, asnjë takim me miq, nuk duhet humbur publiku i mrekullueshëm korçar, nuk duhet humbur atmosfera festive në Korçë. ‘ KoKo FEST’ bën sivjet 5 vjet. I uroj edhe shumë vite të tjera!” Qëndrim Rijani: Motiv për të krijuar “’ Koko FEST’ tashmë është bërë eventi kryesor për motivimin e produkteve të para skenike, në rikthimin e sezonit artistik vjeshtor në teatrot tona mbarëshqiptare. Punojmë projektet tona të para të sezonit me mendjen në Korçë, rikthehemi nga ‘ Koko FEST’ dhe mbetemi me mendjen dhe zemrën po në Korçë”. Adem Karaga: Te teatri marrim jetë dhe dashuri “Korçë, moj zonjë e madhe e shqiptarisë! Ta ndienim zërin e serenatës dhe na mbaje shpirtin gjallë, shpirti i artistëve që ndjehet në çdo rrugicë. Aty te teatri, te zemra e Korçës, aty ku bashkohemi ne të gjithë, marrim dhe japim jetë dhe dashuri nga të gjithë ata që frymuan e frymojnë sa të jetë jeta! Faleminderit ‘ KoKo FEST’, që na bën të ndihemi pjesë e Korçës!”