“KoKo Fest” mbush 5 vjet, festivali që i bën të gjithë të qeshin
Trupa nga Shqipëria e Kosova marrin pjesë në garë, artistët: Do linim gjithçka për të shkuar në Korçë
Ashtu si pa kuptuar, tashmë është bërë 5 vjeç. Qëndron fort mbi këmbët e veta dhe ngjall besim. “KoKo Fest”, Festivali Mbarëkombëtar i Komedisë në Korçë, këtë vit feston 5vjetorin e krijimit.
Nga data 1 deri në 8 shtator, trupa nga e gjithë Shqipëria, por edhe Kosova, do të mblidhen në Korçë në një garë miqësore sepse Korça nuk mund të jetë veçse e tillë. Trupa nga Tirana, Vlora, Durrësi, Fieri, Korça, Prizreni e Prishtina, do të ngjiten në skenën e teatrit “Andon Zako Çajupi” me veprat më të mira të vitit të fundit në zhanrin e komedisë. Janë vepra që janë pritur mjaft mirë nga publiku në skenat e qyteteve të tyre, e tashmë pretendojnë edhe një trofe. “Vetëvrasësi” dhe “Darka e Lamtumirës” vijnë nga Tirana. E para si një bashkëprodhim mes Teatrit Kombëtar dhe “A. Z. Çajupi” dhe e dyta një prodhim i Teatrit Kombëtar Eksperimental “Kujtim Spahivogli”. “Dy dyzina me trëndafila” vijnë nga Fieri, ndërsa nga Durrësi “Komedia që shkon për dreq”, një vepër që u prit me shumë sukses edhe në Tiranë. Nga Vlora vjen “Në dorë të fatit”, ndërsa nga Kosova vjen “Roberto Zucco” nga Prizreni dhe “Hollyshit” nga Prishtina. Vetë Korça ka përzgjedhur veprën “Lajzëlota”. Zgjedhje nga më të larmishmet, që nga komeditë e zeza dhe me mesazhe të forta, tek ato më argëtueset, që të bëjnë të qeshësh me lot, jo më shumë për batutën, sesa për humorin e krijuar prej situatave. Krahas veprave të mira, organizatorët e festivalit premtojnë “surpriza dhe momente të paharrueshme”. BESNIKËT E FESTIVALIT
Përgjatë këtyre 5 viteve, aktorë nga të gjitha trevat shqipfolëse kanë pasur mundësinë të ngjiten në këtë skenë, të interpretojnë, të jenë pjesë e jurisë së saj apo spektatorë. Pavarësisht pozicionit, pavarësisht nëse kanë fituar apo jo, të gjithë janë larguar me përshtypjet më të mira dhe me dëshirën për të qenë pjesë e këtij festivali, edhe në edicionet e ardhshme. Përveçse një garë, në të cilën ia vlen të hysh, kanë gjetur mirëpritjen nga ana e organizatorëve, me në krye drejtoreshën e teatrit “Andon Zako Çajupi”, Zamira Kita, por edhe të gjithë Korçës e korçarëve, të cilët e presin këtë aktivitet si një festë. Nuk i kanë munguar asnjë edicioni aktoret Tinka Kurti e Margarita Xhepa, që kthehen në Korçë me mallin e së shkuarës, por edhe me kënaqësinë e së resë. “Me kënaqësi pres çdo vit ftesën për në ‘ KoKo FEST’. Kam çfarë te gjej në këtë qytet. Entuziazmohem me interpretimet e shume trupave që vijnë në këtë festival, me miqtë e dashur dhe kolegët e shumtë që takoj aty. Shëtis në rrugët e bukura të këtij qyteti unik e endem mes kujtimeve, bukurive, artistëve që gjej aty. I uroj jetë të gjatë festivalit”, shprehet aktorja Margarita Xhepa. “Ky festival më sjell në Korçë e art me një dashuri të madhe. Më sjell kujtime, kolegë, e shfaqje të mrekullueshme. Korça më do dhe e dua, me mallin e viteve dhe me të tashmen e mrekullueshme”, thotë Tinka Kurti, duke i uruar jetë të gjatë dhe suksese festivalit. “Ndjej një përjetim dhe kënaqësi të veçantë kur marr pjesë në ‘ KoKo FEST- in’, që organizohet aq bukur në qytetin e mrekullueshëm te Korçës. Këtu më jepet rasti të takohem me miq, shokë, kolegë e dashamirës të shumtë të këtij qyteti të bukur dhe shumë artistik”, shton aktori Reshat Arbana. E zërave të tyre u bashkëngjiten shumë e shumë aktorë të tjerë, që do të linin gjithçka për të qenë pjesë e këtij aktiviteti. Rrallë dëgjon kaq shumë fjalë të mira, të gjitha bashkë...