Bego, Prokuroria do verifikojë edhe pasurinë e të afërmve

Prokuroria e Krimeve të Rënda që ka nisur verifikimin e pasurisë së biznesmenit Edmond Bego, në zbatim të ligjit antimafia, do të kontrollojë edhe pasuritë e familjarëve të tij. Organi i akuzës u ka nisur dje kërkesë për informacion bankave të nivelit të dytë, Agjencisë së Prokurimeve Publike, disa bashkive e njësive administrative, si dhe Zyrës së Gjendjes Civile. Burimet thanë se shkresa që i është drejtuar Zyrës së Gjendjes Civile kërkon informacion mbi rrethin familjar të Begos, me qëllim verifikimin e pasurive të tyre, nëse janë apo jo të justifikuara. Ndërsa në bankat e nivelit të dytë, kërkohen të dhëna për llogaritë në emër të Edmond Begos, kompanive të tij, por edhe të familjarëve. Gjithashtu do të verifikohen edhe transaksionet që ai mund të ketë kryer. Ndërsa në Agjencinë e Prokurimeve Publike, përveç informacionit, Prokuroria pritet të sekuestrojë edhe dokumentacione të ndryshme që kanë të bëjnë me procedurat e ndjekura për tenderat që Bego ka fituar nga fondet publike, në Tiranë, Elbasan dhe Librazhd. Sipas ligjit shqiptar, një person i dënuar penalisht për krime në kuadër të organizatës kriminale nuk mund të përfitojë nga fondet publike. Burimet thanë se hetimi ka nisur këtë fundjavë, pasi emri i Edmond Begos, u rikthye në qendër të mediave, me një debat politik, pasi Policia greke e ndaloi ne Igumenicë në bazë të një urdhërkërkimi ndërkombëtar të lëshuar nga autoritetet italiane, që më pas rezultoi se nuk ekzistonte. Drejtësia italiane e kishte dënuar Begon në vitin 2008, me 21 vite burg për trafik narkotikësh dhe organizatë kriminale. Por ky vendim ishte njohur në vitin 2010 në Shqipëri nga Gjykata e Lartë, duke e dënuar atë me 4 vjet e 4 muaj burgim, nga të cilat Bego kreu vetëm 1 vit e 11 muaj. Gjykata e Krujës, mbi bazën e kërkesës së tij, ia konvertoi pjesën e mbetur prej 1.8 vitesh burgim në liri me kusht.