Akuzat për Liqenin, Bashkia: S’do ketë ndërtime
Veliaj: Garda i ka kaluar Parkut. Zhupa: Ja dokumenti
Partia Demokratike ka akuzuar dje pozitën se po shkatërron të vetmen mushkëri të qytetit, Parkun e Liqenit Artificial, duke e betonizuar me ndërtime shtesë. Ata i dokumentojnë akuzat e tyre me një kopje të planit të përgjithshëm vendor të bashkisë, miratuar me vendimin Nr. 1 të datës 14.04.2017 nga Këshilli Kombëtar i Territorit, ku rreth 25 mijë metra katrorë te Garda e Republikës, që në muajin korrik i kanë kaluar në pronësi Bashkisë Tiranë, në planin zhvillimor janë parashikuar për kulla. "Në kriteret e vendosura të tipologjisë së ndërtimit për këtë zonë, TR169, ku shtrihet oborri i Gardës së Republikës, zona është miratuar me destinacion që do të ndërtohen struktura lineare të gjata që quhen kulla, ku do të ofrojnë shërbime biznesi, banimi, parkingje etj. Për ta bërë planin efektiv, Këshilli i Ministrave me vendimin Nr. 406, datë 4.7.2018, ka miratuar kalimin në pronësi të Bashkisë Tiranë për hapësirën prej 25 004 m2, që ishte pjesë e Gardës së Re- publikës. Tani, Veliaj e ka rrugën e hapur që mbas fasadës së personit që do bëjë ' Hyrje për Parkun', siç e ka quajtur projektin e kullave, të ndërtojë për interesa të mafies së ndërtimit dhe të drogës kulla në tokën publike, në një nga zonat që duhet të ishin të mbrojtura me ligj", deklaroi zëdhënësja e PD- së, Ina Zhu- pa, një ditë më parë. Sakaq, nuk ka vonuar reagimi i Bashkisë së Tiranës, duke hedhur poshtë akuzat e opozitës për të ashtuquajturin betonizim të Parkut të Liqenit Artificial, të dokumentuar me planin e ri, që ndryshe nga administrata paraardhëse, nuk e përcakton si zonë zhvillimore. "Partisë Demokratike i është dashur 1 vit e gjysmë nga miratimi i planit urbanistik për të zbuluar se, me planin e ri, në zonën e Liqenit nuk lejohen më ndërtime". Sipas bashkisë, zona e Gardës së Republikës, me planin e ri, i kthehet Parkut të Liqenit dhe është e pazhvillueshme, rrjedhimisht nuk do të ketë ndërtime. "Kjo është vetëm 1 nga 5 zonat e ndryshme të Tiranës që Bashkia e Tiranës, me planin e ri, ia ka kthyer Parkut të Liqenit, duke pezulluar tërësisht zhvillimin, ndryshe nga ndërtimet pa kritere që parashikoheshin me planin Basha", nënvizohet në deklaratën për mediat. Por, jo vetëm kaq. Bashkia thotë se ka pezulluar shtesat në volum në dy zona, ku në njërën prej të cilave implikohet edhe kreu i PD- së. "Në dy zona të tjera, tashmë të zhvilluara, pranë Liqenit janë pezulluar shtesat në volum. Një prej këtyre zonave, në fakt, është edhe banesa private e kryetarit të PD- së, i cili gjatë kohës që ishte kryetar bashkie i dha vetes leje ndërtimi për shtesë kati mbi një pallat 11 katësh, në shkelje të pastër të ligjit dhe në konflikt interesi flagrant". Kjo nuk ka bindur aspak zëdhënësen e opozitës, e cila, në një reagim të dytë, insiston që Veliaj t'u tregojë shqiptarëve projektin me kulla, duke e shoqëruar me planin e bashkisë. "Kryemashtruesi i Tiranës, Erion Veliaj, bën gjithmonë të kundërtën e asaj që thotë. Ai tha se në Tiranë do të vendoste ndalimin e ndërtimeve derisa të shiteshin apartamentet stoke, por dha mbi 2 mijë leje ndërtimi në 3 vjet. Erion Betoni duhet t'u tregojë qytetareve projektin me kulla për hyrjen e Parkut të Liqenit dhe të mos fshihet pas projekteve të nisura nga Lulzim Basha".