Gjermania dhe Franca po punojnë për sistem të pavarur pagesash
Gjermania dhe Franca thanë se po punojnë në financimin e zgjidhjeve për të anashkaluar sanksionet e SHBA- së kundër vendeve si Irani, duke përfshirë një rol të mundshëm të bankave qendrore, për të arritur një nivel më të madh pavarësie nga SHBA- ja, pasi Presidenti Donald Trump ka shkatërruar pothuajse të gjitha marrëveshjet e mëparshme tregtare me moton “Amerika e para”. Ministri francez i Financave, Bruno Le Maire, tha të hënën se, “Me Gjermaninë, jemi të vendosur të punojmë në një mjet financimi të pavarur europian ose franko- gjerman, i cili do të na lejonte të mos ishim viktimat kolaterale të sanksioneve ekstra- territoriale të SHBA- së… Unë dua që Europa të jetë një kontinent sovran, jo një vasal dhe kjo do të thotë të kesh instrumente financimi krejtësisht të pavarura, që sot nuk ekzistojnë”. Trump rivendosi sanksionet ndaj Iranit pas tërheqjes së SHBA- së nga marrëveshja bërthamore në maj, pavarësisht kundërshtimit nga aleatët e NATO- s, Kina dhe Rusia. Sipërmarrjet europiane kanë ndërprerë aktivitetin ose kanë pezulluar planet e investimeve për të shmangur sanksionet e SHBA- së, por Franca, Gjermania dhe partnerët e tyre të BE duan që biznesi me Republikën Islamike të vazhdojë. Ministri i jashtëm gjerman, Heiko Maas, po ashtu tha të hënën se BE- ja po punon për të mbrojtur lidhjet ekonomike me Iranin dhe për të mbajtur kanalet e pagesave të hapura. Maas përsëriti një propozim për të bërë sistemet ndërkombëtare të pagesave si “Swift” më të pavarur nga SHBA- ja. Sipas Le Maire, përdorimi i Bankës Europiane të Investimeve, e cila ka ekspozim në SHBA, si një kanal financiar do të ishte shumë i komplikuar dhe se qeveritë franceze dhe gjermane po flasin me bankat qendrore përkatëse për përfshirjen e tyre. “Nëse duam të ndërtojmë një instrument të pavarur, ne duhet të hapim të gjitha opsionet”, tha ai. Maas shtoi se sanksionet e SHBA- së kundër Iranit, veprimet e ndërmarra kundër Kinës, Rusisë dhe Turqisë gjithashtu do të dëmtojnë biznesin europian. “Ne duhet të reagojmë dhe të forcojmë autonominë dhe sovranitetin e Europës në politikën e tregtisë, ekonomisë dhe financave”, tha Maas në një fjalim në Berlin.