Të përndjekurit, zbardhet skema e re e kompensimit
Qeveria miraton ndryshimet e reja në skemën e dëmshpërblimit të ish- të përndjekurve. Kategoritë që preken dhe ndarja e re e kësteve
Skema për shpërndarjen e dëmshpërblimit të ish- të përndjekurve do të ndryshojë.
Qeveria miratoi në mbledhjen e djeshme ndryshimet e ligjit për dëmshpërblimin e ish- të dënuarve politikë të regjimit komunist. Ndryshimet e ligjit përjashtojnë nga përfitimi i dëmshpërblimit trashëgimtarët e radhës së dytë të ish- të përndjekurve që nuk jetojnë, pra, nipërit dhe mbesat. Në rast se familjarët e viktimave kanë vdekur, dëmshpërblimi nuk përfitohet më nga nipërit apo mbesat. Këshilli i Ministrave pritet të miratojë edhe vendimin për korrigjimin e dosjeve. Pra, bëhet fjalë për ish- të përndjekurit të cilët kanë pasaktësi në llogaritjen e dëmshpërblimit financiar si dhe në të dhënat e dosjeve.
PROJEKTLIGJI Projektligji i qeverisë në ndryshimin për ligjin e dëmshpërblimit të ish- të përndjekurve sjell skemën e re të shpërndarjes së parave. Vetëm viktimat e familjarëve kanë të drejtën e përfitimit të dëmshpërblimit. Për rastet kur familjarët nuk janë gjallë, dëmshpërblimi nuk do të përfitohet nga nipërit apo mbesat. “Në rastin kur e drejta e përfitimit të dëmshpërblimit financiar përfundon me mbylljen e rrethit të familjarëve që nuk jetojnë, të përcaktuar sipas pikës 1 të këtij neni, dëmshpërblimi financiar, për pjesën takuese të tyre, kalon në buxhetin e shtetit”, shpje- gohet në projektligj. Drafti i ri i qeverisë përcakton se masa e një kësti dëmshpërblimi do të jetë 1 milion lekë, si për ata që kanë për të tërhequr mbi 80 milionë lekë dhe 1 milion lekë. Pra, përfitues të marrjes të dëmshpërblimit me një këst të vetëm do të jenë vetëm ata që kanë të përcaktuar, si vlerë totale të dëmshpërblimit deri në 1 milion lekë. “Në bazë të buxhetit vjetor të vënë në dispozicion, fondi i dëmshpërblimit të ish- të dënuarve politikë nga regjimi komunist do të ndahet në mënyrë proporcionale për të gjithë përfituesit, me kusht që kësti i dëmshpërblimit të mos jetë më i madh se 1 milion lekë. Për të gjitha subjektet përfituese parësore, kur vlera totale e dëmshpërblimit është mbi 8 milionë lekë, do të vijohet me pagesën e këstit pasardhës deri në shpërndarjen e plotë të shumës së miratuar. Në rast se vlera totale e miratuar për të gjithë përfituesit është deri në 1 milion lekë, shpërndarja e dëmshpërblimit do të kryhet me një këst të vetëm, pavarësisht fazës në të cilën ndodhet shpërndarja e dëmshpërblimit”, thuhet në projektligj.