Avokati i pronarëve në Strasburg: Çfarë po ndodh me 89 dosjet në Gjykatë
PROKURORIA HETIM PER SHANTAZH, PD: BIANKU INFORMOI GJYKATEN
Partia Demokratike akuzoi Kryeministrin Rama si ideatorin e shantazhit ndaj gjyqtarit të Strasburgut, Ledi Bianku.
Në një dalje për mediat nga selia blu, ish- ministri i Drejtësisë, Gazment Bardhi, deklaroi se vetë gjyqtari i Strasburgut ka konfirmuar bisedën mes tij dhe nënkryetarit të KQZ- së, Denar Biba. “Edi Rama, Sekretari i tij i Përgjithshëm, Engjëll Agaçi, nënkryetari i KQZ, Denar Biba, mund të përdorin të gjithë pushtetin për të mbyllur çështjen, por ata nuk mund të ndryshojnë dot një fakt: se gjyqtari Ledi Bianku e ka raportuar shantazhin tek eprorët në Gjykatën e Strasburgut. Media që zbuloi skandalin ka kontaktuar gjyqtarin shqiptar në Strasburg, Ledi Bianku, dhe ai ka konfirmuar jo vetëm takimin me Denar Bibën, por edhe përmbajtjen e bisedës në regjistrimin audio. Gjithashtu, gjyqtari shqiptar në Strasburg ka konfirmuar se në përputhje me detyrimet e tij etike dhe ligjore, pas takimit me Denar Bibën, ka informuar kryetarin e atëhershëm të Gjykatës së Strasburgut, duke e cilësuar mesazhin e të dërguarit të qeverisë si ndikim të papërshtatshëm”, deklaroi Bardhi.
Akuza
Sipas ish- ministrit, heshtja e Kryeministrit Rama përballë një akuze kaq të fortë konfirmon faktin se ai vetë është ideatori i këtij akti kriminal. “Heshtja e Edi Ramës ndaj këtij akti kriminal është pohim i asaj që beson sot shumica e shqiptarëve se ai është urdhëruesi i aktit mafioz për shantazhimin e gjyqtarit në Strasburg dhe se kërcënimi, kapja politike, blerja e korruptimi është modeli i drejtësisë së re që po instalon Edi Rama. Në materialin audio, kërcënimi është i qartë: “Nëse nuk zbaton porosinë e Edi Ramës, pas përfundimit të mandatit, do të mbetesh pa punë. Sakrifica për të zbatuar me korrektësi ligjin, nuk do të shërbejë për asgjë. Ky tren- pra mundësia për të bërë pazar me Qeverinë- nuk do të vijë më në jetë, është thelbi i kërcënimeve mafioze të të dërguarit të Edi Ramës për gjyqtarin e Strasburgut”, sqaron këshilltari ligjor i PD- së.
PRONARËT
Ish- ministri i Drejtësisë e ka cilësuar audio- përgjimin si provën më diskredituese të Edi Ramës, i cili pasi i hoqi të drejtën pronarëve shqiptarë të ankohen në Kushtetuese kërkon t’i ndalojë edhe të gjykohen në Strasburg. “Çfarëdo të bëjë Edi Rama me Engjëll Agaçin, është fakt i pandryshueshëm se të ashtuquajturën ‘ bisedë miqësore’ të Denar Bibës, gjyqtari shqiptar në Strasburg e raportoi pranë Kryetarit të Gjykatës së Strasburgut si ndërhyrje të paligjshme në punën e tij. Një ndërhyrje e tillë synonte ndihmë për qeverinë kundër interesave të pronarëve shqiptarë. Audio- regjistrimi është prova më diskredituese për Edi Ramën se, pasi u hoqi shqiptarëve të drejtën për t’u ankuar me nxjerrjen jashtë funksionit të Gjykatës Kushtetuese dhe Gjykatës së Lartë, me mënyra mafioze, po u heq të drejtën pronarëve për t’u gjykuar nga Gjykata Europiane e të Drejtave të Njeriut dhe për të rifituar pronën e grabitur nga qeveria”, theksoi ish- ministri.