NOKA: RAMA 1.8 MILIONË EURO TENDERA PAPULIT. FUGA: BUDALLALLËK, S'IA VLEN PËRGJIGJJA

Opozita ka denoncuar sërish tenderat e qeverisë “Rama” ndaj bizneseve që janë afër maxhorancës. Në emër të PDsë, nënkryetari i Komisionit të Sigurisë, Flamur Noka, akuzoi dje Kryeministrin Rama se i ka dhënë baxhanakut të tij 41 tendera me vlerë 15.6 milionë dollarë. “PD denoncoi një ditë më parë provën e dokumentuar, se si qeveria e Edi Ramës i ka dhënë baxhanakut të tij, Armand Frangu, 41 tendera me vlerë 15.6 milionë euro. Ky nuk është rasti i fundit”, tha ai. Por, po dje, Noka ka denoncuar një tjetër rast të favorizimit që, sipas tij, u bën qeveria kompanive të miqve të Kryeministrit. “Kompanisë së mikut të Ramës, Agron Papuli, siç provohet edhe në dokumentet zyrtare nga Agjencia e Prokurimit Publik, në muajin korrik të këtij viti i është dhënë tenderi e radhës. Bëhet fjalë për një tender me objekt ‘ qira operacionale automjetesh nga Policia e Shtetit, 1.8 milionë euro’”, tha dje Noka. Sipas tij, marrja me qira e makinave kushton më shumë sesa blerja e tyre. “Janë 127 tendera që i janë dhënë mikut të Kryeministrit, Agron Papuli, që prej ditës që qeveris Edi Rama. Duke bërë një llogari të thjeshtë, rezulton se nga buxheti i shtetit, për mikun e Kryeministrit Agron Papuli, janë dhënë 17.3 milionë euro”, tha dje Noka. Për këto akuza ka reaguar dje dhe drejtori i Komunikimit i Kryeministrit, i cili i ka quajtur budallallëqe akuzat e opozitës. “Dje, njeri, sot tjetri. Përgojojnë njerëz e hedhin në eter shifra shumëmilionëshe, duke e bërë të kotë që t’u përgjigjesh për çdo budallallëk! Kryeministri dhe qeveria janë të vendosur të çojnë përpara reformat dhe të fokusojnë të gjithë vëmendjen te njerëzit e te puna në shërbim te tyre”, tha dje Endri Fuga.