Kosovë, opozita do seancë kundër Thaçit
Presidenti: Propagandë e paskrupullt kundër ndërkombëtarëve
Opozita në Kosovë ka dorëzuar kërkesën për mbajtjen e seancës së jashtëzakonshme më 4 shtator për të miratuar një rezolutë, e cila do të ndalonte që në bisedimet Kosovë- Serbi të diskutohej për lëvizje të kufijve. Shefi i Grupit Parlamentar të LDK- së, Avdullah Hoti, tha se pro rezolutës janë më shumë se 80 deputetë. Hoti e ka publikuar në "Facebook" kërkesën e mbajtjes së seancës së jashtëzakonshme, tri ditë para se Presidenti Hashim Thaçi të udhëtojë në Bruksel për t'u takuar me homologun e tij serb, Aleksander Vuçiç. Në këtë seancë pritet të votohet rezoluta që parasheh se askush nuk ka kompetencë që të flasë për territorin e vendit në dialogun me Serbinë. E gjithë opozita është kundër Thaçit në këtë rrugëtim për ndryshimin e kufijve. Shefi i Grupit Parlamentar të Lëvizjes Vetëvendosje, Glauk Konjufca, në një intervistë për "Radio Europa e Lirë", ka paralajmëruar protesta në muajin shtator, nëse tentohet të ndryshohen kufijtë e Kosovës. Po ashtu edhe deputeti i Partisë Socialdemokrate, Driton Çaushi, thotë se qëllimi kryesor i seancës së 4 shtatorit është që më në fund Kuvendi të marrë në dorë përgjegjësinë që i takon në raport me bisedimet me Serbinë. Partia e Kryeministrit Ramush Haradinaj, Aleanca për Ardhmërinë e Kosovës dhe Nisma Social- demokrate, kanë bërë të ditur se do të marrin pjesë në seancën e jashtëzakonshme. Haradinaj ka thënë se nëse në rezolutë ka qoftë edhe një pikë që kundërshton ndryshimin e kufijve, atëherë ai do ta votojë atë. Por, në Partinë Demokratike të Kosovës, kjo seancë e jashtëzakonshme konsiderohet jo serioze. Memli Krasniqi, shefi i Grupit Parlamentar të PDKsë, tha se kjo po bëhet më shumë për politika ditore të partive opozitare. Ndërsa Presidenti Hashim Thaçi, në një reagim në "Facebook", tha se partitë opozitare po bëjnë një propagandë të paskrupullit kundër aleatëve ndërkombëtare, duke e quajtur këtë të rrezikshme dhe të turpshme.