Kaloi vetingun, ankimohet vendimi për Antoneta Sevdarin
Komisioneri Publik: Hetim jo i plotë për prokuroren e Tiranës
Komisioneri Publik ka ankimuar vendimin e konfirmimit në detyrë të prokurores së Tiranës, Antoneta Sevdari, me arsyetimin se hetimi nuk ka qenë i plotë.
Prokurorja e Prokurorisë së Tiranës e kaloi me sukses shkallën e parë të vetingut, pasi u konfirmua në detyrë nga Komisioni i Pavarur i Kualifikimit, më datë 18 korrik. Por Institucioni i Komisionerëve Publikë vendosi të apelojë verdiktin e KPK- së për prokuroren Sevdari, në Kolegjin e Posaçëm të Apelimit, pranë Gjykatës Kushtetuese. Në vlerësimin e Komisionerit Publik, në rastin e prokurores Antoneta Sevdari, konfirmimi në detyrë i subjektit të rivlerësimit nga Komisioni i Pavarur i Kualifikimit është bërë në interpretim të një hetimi të pamjaftueshëm dhe të provave jo të plota, të administruara gjatë hetimit administrativ. Për këtë arsye, Institucioni i Komisionerit Publik do të kërkojë nga Kolegji i Posaçëm i Apelimit, që të plotësojë hetimin e KPK- së për prokuroren e Tiranës. Antoteta Sevdari është njëkohësisht edhe kandidate për anëtare në Këshillin e Lartë të Prokurorisë, ndërsa bëhet e teta pjesëtare e sistemit të drejtësisë, për të cilën Komisioneri Publik e ankimon vendimin në KPA.
KOMISIONERI PUBLIK
Në njoftimin e animimit të IKP, thuhet se Komisioneri Publik, brenda afatit ligjor, ka ushtruar ankimim në Kolegjin e Posaçëm të Apelimit pranë Gjykatës Kushtetuese, kundër vendimit nr. 42, datë 18.7.2018, të Komisionit të Pavarur të Kualifikimit, për subjektin e rivlerësimit, Antoneta Sevdari, prokurore në Prokurorinë e Gjykatës së Shkallës së Parë, Tiranë, kandidate për anëtare e Këshillit të Lartë të Prokurorisë. "Në vlerësimin e Komisionerit Publik, në rastin konkret, hetimi i Komisionit të Pavarur të Kualifikimit nuk është i plotë. Për rrjedhojë, faktet dhe provat e administruara në përfundim të këtij hetimi administrativ janë të pamjaftueshme për të mbështetur vendimin e Komisionit të Pavarur të Kualifikimit për konfirmimin në detyrë të subjektit të rivlerësimit, referuar pikës 1 të nenit 59 të ligjit nr. 84/ 2016, ' Për rivlerësimin kalimtar të gjyqtarëve dhe prokurorëve në Republikën e Shqipërisë'. Bazuar në përmbajtjen e pikës 3, të nenit F, të aneksit të Kushtetutës së Republikës së Shqipërisë, Komisioneri Publik, nëpërmjet këtij ankimi, kërkon nga Kolegji i Posaçëm i Apelimit që këto mangësi të hetimit administrativ të kryera nga Komisioni i Pavarur i Kualifikimit të mund të riparohen nga Kolegji gjatë shqyrtimit të çështjes në seancë gjyqësore", thuhet në njoftim.
KONFIRMIMI
Prokurorja pranë Gjykatës së Shkallës së Parë Tiranë, Antoneta Sevdari, kandidate për Këshillin e Lartë të Prokurorisë, u konfirmua në detyrë nga Komisioni i Pavarur i Kualifikimit në 18 korrik 2018. Trupa gjyqësore, e përbërë nga Firdes Shuli, Valbona Sanxhaktari dhe Roland Ilia, vendosi që Sevdari ta kalonte vetingun, pasi, sipas hetimeve të kryera nga KPK, prokurorja e Tiranës nuk kishte kryer fshehje pasurie, ishte e aftë profesionalisht dhe nuk ka pasur kontakte me njerëz të papërshtatshëm, 3 shtylla këto mbi të cilat bazohet filtri i vetingut. Por duket se ka qenë mbyllja e një dosjeje, ajo që ka penalizuar Sevdarin, të paktën sipas Komisionerit Publik. Bëhet fjalë për një vendim të Gjykatës së Shkallës së Parë, për pushimin e çështjes ndaj të pandehurit G. D., ish- kryetar komune, i akuzuar për fshehje pasurie dhe deklarim të rremë, për të cilin Sevdari nuk e ankimoi vendimin. Ndërsa në njoftimin e Komisionerit Publik thuhet se hetimi për Sevdarin nuk ka qenë i plotë.