Kriza e monedhës në Turqi mund të trazojë ekonomitë e Ballkanit
Lufta tregtare e Turqisë me Shtetet e Bashkuara, si dhe marrëdhëniet e tensionuara me Bashkimin Europian mund të ndikojnë në rënien e ekonomisë në Turqi, por edhe në vendet e Ballkanit. Monedha turke ka rënë në mënyrë dramatike gjatë javëve të fundit. Sipas një raporti të BIRN, qeveritë në Ballkan druhen se rënia e vlerës së monedhës do të stimulojë eksportet turke, ndërkohë që investimet shtetërore dhe private në rajon do të thahen. Rënia dramatike e vlerës së lirës ka shqetësuar tregjet për rrezikun e ndikimit të këtij fenomeni edhe në vende të tjera. Por, ndërkohë që Europa dhe bankat e saj kanë fuqinë për të luftuar çdo problem financiar, ekonomitë e brishta të Ballkanit kanë arsye të druhen. Sipas BIRN, ekonomistët thonë se ndërsa eksportet turke në Ballkan mund të rriten, të nxitura nga rënia e çmimeve dhe një treg i ngutshëm për mallrat turke diku tjetër, trazirat financiare të vendit mund të ulin frenat e investimeve turke, si ato shtetërore, edhe ato private, në një rajon që Ankaraja po përpiqet të kultivojë, Ballkani. Monedha kombëtare e Turqisë ka rënë me rreth 40 për qind këtë vit dhe kjo i atribuohet shqetësimit të investitorëve në lidhur me vendimet e Presidentit Recep Tayyip Erdogan si dhe emërimin e dhëndrit të tij si ministër i Financave. Berat Albayrak tha se qeveria e tij nuk sheh një rrezik të madh për ekonominë dhe sistemin financiar të vendit, mes një grindjeje diplomatike me Shtetet e Bashkuara. Komenti i tij erdhi pasi agjencia e vlerësimit "Moody's" uli vlerësimin e besimit financiar për 20 institucione financiare turke të martën. "Ne nuk shohim ndonjë rrezik të madh për sistemin ekonomik apo financiar të Turqisë", tha ministri, duke iu referuar rreziqeve më të mëdha, me të cilat mund të përballet Turqia për vitin 2019. Sipas "Hurriyey", Albayrak ka thënë se borxhi publik neto dhe borxhi i brendshëm i Turqisë ishin të ulët dhe sistemi i saj financat shumë i fortë. "Ekonomia jonë ka themele të forta. Pika kryesore këtu është që ne të kuptojmë se cilat janë deficitet tona... Në këtë drejtim, ne do të realizojmë reformat strukturore të nevojshme", tha ai në intervistë. Të martën, "Moody's' vlerësoi se mjedisi operativ i Turqisë ishte përkeqësuar përtej pritshmërive të mëparshme, duke ulur vlerësimin për 18 banka dhe dy kompani të financiare.