Basha: Lala denoncoi lidhjet e deputetit të PS me Shullazin
Sulmi ndaj gazetares, kreu i opozitës: Rama të thërrasë banditët e vet brenda dhe jashtë burgut
Kryetari i opozitës, Lulzim Basha, kërkoi nga Kryeministri Edi Rama të gjejë me urgjencë dhe të vendosë përpara drejtësisë përgjegjësit e aktit mafioz të sulmit me armë ndaj banesës së familjes së gazetares Klodiana Lala.
Në një deklaratë për mediat menjëherë pas publikimit të ngjarjes, Basha kujtoi se vetëm pak kohë më parë gazetarja Klodiana Lala kishte denoncuar lidhjet e ngushta mes deputetit të PS- së, Jurgis Çyrbja, dhe bandës së Emiljano Shullazit. “Mesazhi mafioz për gazetaren është i qartë: se kush del nga rreshti, kush nuk u bindet urdhrave, kush shqetëson qeverinë, kush nuk i bindet sundimit të krimit, e ka fundin e shpejtë. Dua të shpreh vendosmërisht mbështetjen time dhe të Partisë Demokratike për Klodiana Lalën, familjarët e saj dhe çdo gazetar të papërkulur nga krimi, të pablerë nga kjo qeveri që, prej 5 vjetësh, nuk u shërben qytetarëve, por bashkëqeveris me krimin. Edi Rama i ka zëvendësuar kriminelët që dekriminalizimi i nxori jashtë Parlamentit, me të emëruarit e kriminelëve. Sulmi me armë ndaj gazetares Klodiana Lala, e cila së fundmi denoncoi dhe nxori në dritë lidhjet e ngushta të deputetit të Edi Ramës, Jurgis Çyrbja, me bandën e Emiljano Shullazit, janë tregues se me Edi Ramën, krimi ndihet i paprekshëm! Kjo është e vërteta e hidhur! Prej 5 vjetësh, krimi po triumfon, sepse krimi bashkëqeveris me Edi Ramën”, tha Basha. Për kreun e opozitës, Rama e ka fare të thjeshtë të gjejë përgjegjësit e sulmit me armë ndaj gazetares, mjafton të kontaktojë me banditët e tij brenda dhe jashtë Parlamentit, brenda dhe jashtë burgu. “Falë bashkëqeverisjes me Edi Ramën, krimi kontrollon kupolën e Policisë dhe Ministrinë e Brendshme. Prej bashkëqeverisjes së Edi Ramës me krimin, sot Shqipëria nuk ka Polici, nuk ka Prokurori, nuk ka Gjykata. Edi Rama të lërë lotët e krokodilit dhe të gjejë autorët e sulmit mafioz me armë kundër gazetares Klodiana Lala! Le të thërrasë banditët e vet brenda dhe jashtë burgut, le të flasë me horrat e vet brenda dhe jashtë Parlamentit dhe të gjejë ma- fiozët që, nën mbrojtjen e qeverisë së tij, guxojnë të përdorin armë kundër gazetarëve që zbulojnë lidhjet e krimit me Edi Ramën dhe qeverinë e tij”, theksoi kreu i PD- së. Basha paralajmëroi kreun e qeverisë se do të mbajë përgjegjësi personale nëse gazetares Lala dhe familjarëve të saj u preket qoftë edhe një fije floku.