“Letër Strasburgut për veprimet arbitrare të qeverisë me pronat”
Partia Demokratike iu referua qëndrimit të mbajtur nga Gjykata e Strasburgut për përgjimin mes nënkryetarit të KQZ- së, Denar Biba, dhe gjykatësit shqiptar në Strasburg, Ledi Bianku, për të akuzuar qeverinë shqiptare dhe Kryeministrin Rama për shantazh dhe ndërhyrje të papërshtatshme. Në një dalje për mediat, nënkryetarja e Komisionit të Ekonomisë, Jorida Tabaku, ka deklaruar se sekseri i Ramës, Denar Biba, shantazhoi gjyqtarin Bianku në lidhje me çështjen e pronave në Shqipëri. “Gjykata Europiane e të Drejtave të Njeriut konfirmoi zyrtarisht se qeveria shqiptare ka tentuar të ushtrojë presion dhe e ka konsideruar të papërshtatshme këtë ndërhyrje. Çdo gjë tjetër nga ana e qeverisë dhe Prokurorisë është propagandë. Përfaqësues të qeverisë shqiptare, nën emrin dhe frymëzimin e drejtpërdrejtë të Kryeministrit Rama, kanë kërkuar të ndikojnë në vendimin e Gjykatës Europiane në lidhje me shqyrtimin e Ligjit të Kthimit dhe Kompensimit të Pronave. Një përpjekje e tillë, jo vetëm që është e turpshme dhe fyese për një qeveri që këndon refrenin e Reformës në Drejtësi, por mbi të gjitha është edhe akti më domethënës i asaj çfarë përfaqëson Rama dhe qeveria e tij. Prandaj, jo rastësisht komunikimet e Gjykatës Europiane të të Drejtave të Njeriut si dhe emërimet e qeverisë shqiptare pranë kësaj gjykate, janë tërësisht partizane dhe politike. Qëllimi i këtyre emërimeve ka qenë dhe mbetet krijimi i një linje informacioni të drejtpërdrejtë nga Gjykata te Rama”, tha Tabaku. Sipas nënkryetares së Komisionit të Ekonomisë, PD- ja informoi Gjykatën e Strasburgut për veprimet arbitrare të qeverisë dhe mjetet ligjore të përdorura, duke cenuar rëndë të drejtën e pronës nga viti 2014 e në vijim. “Arsyeja se përse qeveria dërgoi z. Biba si një mesazher lidhet me një çështje të rëndësishme; pronën! Kjo nuk është diçka e re për qeverinë në trajtimin e çështjes së pronës, për këtë arsye këtë pranverë Partia Demokratike ka informuar Gjykatën Europiane të të Drejtave të Njeriut për veprimet arbitrare të Qeverisë dhe mjetet ligjore të përdorura duke cenuar rëndë drejtën e pronës nga viti 2014 e në vijim. Politika e ndjekur nga ana e Qeverisë Shqiptare nuk ka qenë në asnjë rast në drejtim të zgjidhjes së problemit të pronës. Qeveria “Rama” është angazhuar në drejtim të shpronësimit të dytë të pronarëve, në shërbim të pasurimit të një grupi personash nën termin ‘ pronarë të rinj’, që në fakt janë uzurpues të paligjshëm të pronave”, theksoi deputetja e PD- së. Sipas Tabakut, Kryeministri Rama ka vijuar të bëjë gjithçka kundër pronarëve legjitimë, duke shpronësuar tokat e tyre me vetëm 1 euro, ndonëse ato mund të ndodhen në qendër të Tiranës. “Qeveria e Kryeministrit Rama miratoi Ligjin për Investime Strategjike, që i jep shtetit autoritetin të ndërhyjë në marrëdhënien mes një pronari të tokës dhe investitorit privat. Ligji në fjalë i jep akses të tepruar qeverisë, duke cenuar sigurinë juridike të pronarëve. Megjithëse Partia Demokratike përgatiti amendamente, këto nuk u miratuan. Vendimet e njëpasnjëshme të Ramës tregojnë qartazi synimin për të tjetërsuar me të gjitha mënyrat pronën e pronarëve të ligjshëm. Arsyet e vërteta që lidhen me Ligjin e ri të Kthimit dhe Kompensimit të Pronës nuk janë pamundësia e qeverisë për të kthyer pronën apo për ta kompensuar. Por është mosdëshira për të regjistruar pronat, për të krijuar një fond të konsoliduar fizik dhe financiar e deri në mungesë vullneti për t’u koordinuar mes institucioneve që merren me pronat”, sqaroi Tabaku.