Thaçi, opozitës: Nëse doni luftë me Serbinë, i pafshi hairin

Haradinaj: Në dialog s’do diskutohet për kufijtë e Kosovës

Krerët e institucioneve kryesore të Kosovës janë takuar të enjten për të shqyrtuar propozimin e shkëmbimit të territoreve me Serbinë.

Menjëherë pas takimit, asnjëri prej liderëve nuk është deklaruar për mediat. Në takim morën pjesë Presidenti Hashim Thaçi, Kryeministri Ramush Haradinaj, kryeparlamentari Kadri Veseli, zëvendëskryeministri Fatmir Limaj, zëvendëskryeministri dhe ministri i Diasporës, Dardan Gashi dhe ambasadori amerikan në Kosovë, Greg Delawie. Në pjesën e parë të takimit u raportua se krerët e shtetit kanë marrë vendim që tema e shkëmbimit të territoreve të mos hapet në takimin ThaçiVuçiç në Bruksel. Deklarata u bë nga Kryeministri Haradinaj. Ai tha se ideja e Thaçit për shkëmbim të territoreve nuk do të përkrahet e as nuk do të diskutohet në takimin e radhës në Bruksel. Ai tha se territori dhe kufijtë e Kosovës nuk do të negociohen dhe se hapja e kësaj teme çon në luftë dhe konflikte. “Në dialog nuk do të negociohet për kufijtë e Kosovës. Ne kishim biseda të gjata, askush nga ne nuk do të dalë nga Kushtetuta e vendit dhe nga integriteti e kufijtë e Kosovës”, tha Haradinaj. “Jemi dakord të ketë proces të dialogut, njohje reciproke për Kosovën. Por nuk kthehemi prapa, pra, Kosova i ka kufijtë e vet. Krejt pikëpamjet janë fol, është qëndrim i gjithëve ne që territori dhe kufijtë nuk do të diskutohen në Bruksel”, theksoi ai. Pjesa e dytë e takimit u mbajt edhe në prani të Greg Delawie. Ndërkohë, Presidenti i Kosovës, Hashim Thaçi, sa i përket kundërshtimeve të opozitës për shkëmbim të territoreve, duke iu referuar deklaratave për luftë, pa përmendur Haradinajn tha se, “Vendimin përfundimtar për marrëveshjen Kosovë- Serbi do ta japin qytetarët. Nëse dikush do me i shpallë luftë Serbisë, le të urdhërojnë, edhe Albin Kurti, edhe Isa Mustafa. Hairin ia pafshin. Ndoshta kanë trimëri e zotësi... lufta ka përfunduar. E kemi fituar luftën, Kosova është e lirë dhe e pavarur”, tha Thaçi. Sipas tij, tani qasja e Kosovës është si të anëtarësohet në NATO dhe Bashkimin Europian. Deklaratat, Thaçi i bëri pas dy takimeve që pati të enjten me Kryeministrin Haradinaj dhe krerët e tjerë të koalicionit, për dialogun me Serbinë. Thaçi mund të përballet me një paraqitje në Kuvendin e Kosovës për të sqaruar qëndrimin e tij mbi “korrigjimin e kufijve” ku pritet që opozita të “sulmojë” fort. Më 4 shtator opozita ka kërkuar të voto- het një rezolutë që ndalon diskutimin e territorit më bisedimet Kosovë- Serbi, si antikushtetuese. LDK- ja dhe Lëvizja Vetëvendosje kanë qenë kundër idesë për shkëmbim të territoreve dhe po kërkojnë të votohet rezoluta, për “mbrojtjen e integritetit territorial”.