Rusia, gati stërvitjen ushtarake në Mesdhe me raketa e nëndetëse
NATO ka njoftuar se marina ruse po përforcon praninë e saj në detin Mesdhe, mes tensioneve në rritje rreth luftës në Siri. Rusia ka siguruar mbështetje të rëndësishme ushtarake për forcat qeveritare siriane, të cilat pritet të ngrenë një ofensivë në provincën veriore Idlib, bastioni i fundit i madh rebel në vend. “Ne nuk do të spekulojmë për qëllimin e flotës ruse, por është e rëndësishme që të gjithë aktorët në rajon të përmbahen nga përkeqësimi i një situate humanitare, tashmë të shkatërruar në Siri”, tha të mërkurën zëdhënësja kryesore e NATO- s, Oana Lungesku. Ajo shtoi se disa prej anijeve ruse janë të pajisura me raketa. Të paktën tetë anije dhe dy nëndetëse raketambajtëse janë bashkuar me flotiljen ruse gjatë tri javëve të fundit. Të enjten, Ministria ruse e Mbrojtjes njoftoi përmes agjencisë shtetërore të lajmeve TASS, se forcat e saj do të kryenin një stërvitje ushtarake në Mesdhe, e cila përfshin 25 anije dhe 30 avionë luftarakë, duke nisur nga 1 shtatori. Sipas zyrtarëve në Moskë, rebelët sirianë po përgatisin një sulm me armë kimike në Idlib, si një provokim për të nxitur një sulm perëndimor ndaj forcave siriane. Zëdhënësja e Departamentit të Shtetit, Heather Nauert, reagoi duke thënë: “Ne kemi parë se para se të përpiqen të vënë fajin, ata përpiqen të vënë barrën në grupe të tjera dhe ne nuk na e shesin dot këtë”. Vendet perëndimore dhe analistët e pavarur thonë se forcat qeveritare siriane kanë kryer disa sulmesh kimike gjatë luftës civile shtatëvjeçare. Shtetet e Bashkuara u zotuan të përgjigjen nëse forcat siriane përdorin armë kimike në Idlib. Vendet perëndimore kryen sulme ndaj forcave qeveritare siriane pas një sulmi të dyshuar kimik më parë këtë vit. Si Siria dhe Rusia e mohojnë që forcat qeveritare kanë përdorur armët kimike. Ndërkohë, OKB- ja ka paralajmëruar se çfarëdolloj sulmi tjetër nga secila palë në Siri, do të jetë shkatërruese për civilët.