Nga shorti te Zaneti, ja deklaratat e protagonistëve
Pasi janë mësuar grupet pjesëmarrëse në Ligën e Kampionëve, përfaqësuesit e klubeve të pranishëm në ceremoni kanë komentuar shortin. Jurgen Klop ( Liverpul/ PSG - Napoli - Crvena Zvezda) "Është si është, nuk ka problem. Liga e Kampionëve është gara më e madhe për klube në botë. Ne nuk mund të presim grup të lehtë". Kur ke një grup me PSG dhe Napolin, absolutisht dy ekipe të mrekullueshme, atëherë nuk dëshiron ta kesh Liverpulin si ekip të tretë. Nëse mendon për grupin, atëherë je i eliminuar. Nëse mendon se është vështirë, je i eliminuar. Ne nuk mendojmë asnjë prej tyre. Ne luajmë ndeshjet dhe do të jemi konkurrues. Sezoni i kaluar është sezon i kaluar dhe ne duam kualifikimin tutje. Do të jetë vështirë, por duam të shkojmë tutje. Le të fillojmë punën për këtë". Havier Zaneti ( Inter / Barcelona - PSV - Totenhem) "E dimë që në këtë kompeticion ka ekipe të forta dhe ne ramë në një grup të vështirë. Do përgatitemi shumë mirë. I dimë vështirësitë, por ne jemi Interi dhe duhet të mendojmë pozitivisht. Mesi? Nuk është vetëm ai, Barcelona ka lojtarë fantastikë që mund të bëjnë gjëra të jashtëzakonshme".
Masimiliano Alegri ( Juventus/ Mançester Junajtid - Valencia - Jang Bojs):
"Grup impenjativ dhe skuadra me vlera absolute, tradita të mëdha dhe stadiume historike: Kjo është Champions Liga e re", shkruan Alegri në rrjetin social "Twitter". Françesko Toti ( Roma/ Real Madrid - CSKA - Viktoria Plzen): "Le të themi se në letër gjithçka duket e lehtë. Është një grup i vështirë, e dimë se Reali do bëjë garën e vet, sepse janë kampionët aktualë, por ne do bëjmë gjithçka që të jemi të dytët. Do e shohim si do jetë Reali pa Ronaldon, por e dimë që kemi të bëjmë me jashtëtokësorë. Nuk do jetë e lehtë për ne. Është normale që kemi pritshmëri të larta". Karlo Ançeloti ( Napoli/ PSG - Liverpul - Crvena Zvezda): "Kemi një grup shumë të vështirë dhe luajmë ndaj dy kandidatëve potencialë për fitimin e Champions- it, por jam i sigurt se do ta kenë të vështirë përballë Napolit".
Dje, Interi ( bashkë me të edhe skuadrat e tjera italiane) njohu fatin që e pret në Ligën e Kampionëve, por Mauro Ikardi atë kupë e ëndërron prej shumë kohësh. E ka rrëfyer vetë kapiteni zikaltër për "Corriere della Sera", në rubrikën "Intervistë e dizajnuar". Një intervistë, pra, ndryshe nga të tjerat: bomberit zikaltër i është kërkuar t'i pikturojë përgjigjet në vend që të përdorte fjalët. Gjatë ditëve të ardhshme pritet takimi mes futbollistit dhe klubit për të diskutuar rinovimin: menaxherja- bashkëshorte, Vanda Nara, mendohet të ketë bindur drejtorin sportiv, Piero Auzilio, dhe së shpejti palët do të ulen në tavolinën e bisedimeve.
GJËRA TË MËDHA - Por, fillimisht duhet menduar për rezultatet personale dhe ato me fanellën interiste. Nga të qenit kapiten i Interit në moshën 22- vjeçare, te raporti me Vanda Narën, Argjentina kur ai ishte fëmijë, objektivat e radhës së Interit dhe si ndërtohet një grup fitues... Champions- i, megjithatë, është objektivi kryesor i Ikardit, që do debutojë në kompeticionin e shumëpritur. Mauro, që nesër shpreson të zhbllokohet kundër Bolonjës, kundër së cilës ka shënuar 4 gola dhe nuk ka humbur kurrë ( 4 fitore e 4 barazime mes Interit e Sampdorias), këtë herë është shprehur kështu: "Ku do jetë Interi në fund të sezonit?" Si përgjigje, Ikardi ka pikturuar veten duke fjetur në krevat, teksa ëndërron tripletën: titull, Kupë të Italisë dhe Champions. "Interi ëndërron gjëra të mëdha", ishte dicitura në vizatim. Përgjigjet edhe mbi Vanda Narën. Te pyetja si gjendet ekuilibri mes bashkëshortes dhe menaxheres, Ikardi vizaton një këpucë me takat mbi topin dhe veten teksa kap për dore Vandën, me shkrimin ekuilibër= dashuri, besim, besnikëri. Është edhe Zaneti, që vendos dorën mbi një Ikardi "të vogël": ai është shembulli që Mauro ka ndjekur kur mbante veshur fanellën e kapitenit, 22 vjeç. Rregullat për një goditje me kokë perfekte? Ideja kryesore ( e thënë nga një bomber i nivelit të tij vlen si "ari") është koordinimi në kërcim. Argjentina e tij? Shfaqet Roziario, qyteti ku ka lindur; shton më pas disa fëmijë që luajnë futboll në rrugë. 100 gola me fanellën e Interit: objektivi i radhës? Përgjigjja e Ikardit është një rrugëtim ende larg finishit. Dhe si kapiten i mirë, i përgjigjet edhe pyetjes se si ndërtohet një grup fitues: pesë interistë që përqafohen dhe poshtë duken fjalët e Alfredo Di Stefanos: "Asnjë lojtar nuk është aq i zoti sa të gjithë të bashkuar".