VENDIMI I RI Sa do tatohet shitja e shtëpive dhe pronave
Zbardhet vendimi i ri i Financave dhe Drejtësisë për tatimin e shitjes së pronave. Shembujt zyrtarë sa do paguhet për çdo transaksion
Ndryshon udhëzimi për llogaritjen e tatimit 15 për qind kur shitet një shtëpi apo dhurohet. Ministria e Financave dhe Ministria e Drejtësisë kanë nxjerrë një udhëzim të përbashkët, që përcakton mënyrën e tatimit të kalimit të së drejtës së pronësisë së pasurisë së paluajtshme. Udhëzimi i ri përfshin 29 shembuj se si llogaritet tatimi 15 për qind për rastet kur shitet një shtëpi e ndërtuar, para vitit 1992, apo kalimin e pronësisë nëpërmjet dhurimit, si do të tatohen pronat që u rivlerësuan me amnistinë fiskale, apo për shitjen e tokave dhe dyqaneve. Gazeta boton sot shembujt, të cilët specifikojnë llogaritjen e tatimit për rastet e shitjes së shtëpive. Tatimi 15 për qind llogaritet nga diferenca e vlerës së shitjes së një shtëpie, toke apo dyqani me atë të blerjes. Për apartamentet e ndërtuara para vitit 1992, të cilat janë privatizuar nga qytetarët me çmime sim- bolike. Për rastet kur shtëpia nuk është shitur asnjëherë si çmim blerjeje do të llogaritet kostoja e shfrytëzimit për m2 të vitit kur shtëpia është regjistruar në Hipotekë. Kurse vlera e shitjes do të jetë sipas çmimeve fiskale aktuale, por e llogaritur për 70 për qind të çmimit fiskal, sipas zonës ku është ndërtuar apartamenti. Më pak tatim do të paguajnë shtëpitë e rivlerësuara. Qytetarët që kanë bërë rivlerësimin e pasurive të tyre të paluajtshme në hipoteka me tatimin 3 për qind, përfitojnë nga fakti se si vlerë fillestare do të merret vlera e dalë nga rivlerësimi i pasurisë. Pra, nëse një qytetar e ka rivlerësuar apartamentin e tij në vlerën e 4 milionë lekëve dhe e shet atë për 3.5 milionë lekë, si vlerë shitjeje do të merret vlera më e madhe, pra, sipas rivlerësimit. Shitësi në këtë rast do të paguajë ( 4 milionë - 4 milionë) x 15%= 0 lekë.